Shillong, K’Lyngkot 22
U nongïalam ka seng Congress, u Rahul Gandhi, u la ïaroh ïa u sohtrun ba pynmih na Meghalaya hadien ba u la mad ïa une u soh katba u dang wan ïaid sha Nongpoh, Ri-Bhoi ha ka Lah Sngi U Blei.
Ïa kane, u Rahul u la ïathuh haba ai jingkren sha ki paidbah kiba la ïalum lymbung ha Madan Pahamsyiem hadien ba u la wan rung na Assam kum shi bynta na ka jingïaid lynti jong u ïa kaba la ai kyrteng ‘Bharat Jodo Nyay Yatra’.
Hashwa ba un pynkut ïa ka jingkren jong u, u Rahul u la ong, “Ha ka por ba ngi dang ïa wan shane, ngi la sangeh ha lynti ban mad ïa u sohtrun. Ki la don kine ki shi kmie shi khun kiba la die ïa u sohtrun, bad ha ka jingim ka jong nga, ngam pat ju ïoh mad ïa uba kum uto u sohtrun.”
Nalorkata, u la ong ba mar ïa dep bam, u la kren lyngba ka ‘phone’ bad ka kmie jong u, ka Sonia Gandhi, bad u la ong ïa ka ba un sa wanrah ïa u sohtrun uba lehse u dei uba bang tam ha ka pyrthei. Hynrei u Rahul u la buh jingkylli ruh ba balei une u sohtrun uba bang bathiang ym die sha kiwei pat ki bynta jong ka pyrthei. “Balei ym die ha London, New York, Tokyo? Balei ki nongrep bad kito ki shi kmie shi khun kim ïoh jingmyntoi na ka jingdie ïa u sohtrun sha kiwei pat ki bynta jong ka pyrthei?” Ïa kine ki jingkylli, u Rahul u la ai hi ka jubab da kaba ong ba ym pat don satia ki jingpynbiang ïa ki jingdonkam ban phah ïa u sohtrun na Meghalaya sha kiwei pat ki bynta jong ka pyrthei.
Nalorkata, u la ong ruh ba tang na ki mar rep ba pynmih ha ka jylla lajong, ki paidbah ka Meghalaya ki lah ban kylla long kiba riewspah. Hynrei u la ong pat donkam ïa ka saiñdur kaba biang na ka bynta ban pynkiew ïa ka jylla.
