Shillong, K’lyngkot 22
Ka Myntri kaba peit ïa ka tnat Aiñ, ka Kong Ampareen Lyngdoh ka la ieh ha u Myntri Rangbah u Conrad K Sangma ban kren halor ka jingweng noh ïa ki ophisar kiba la shongthait kiba don bad ka Meghalaya Lokayukta bad kan pynsngew ruh halor ka jingïakynduh jong ka bad ki nongïalam ka VPP haba ïadei bad kane ka mat.
Wat la kam kren than, hynrei ka Kong Ampareen ka la shu ong ba ka jingïakynduh bad ki nongïalam ka VPP ka long kaba seisoh bad namarba ka don ka jingdonkam ban ïakynduh bad u Myntri Rangbah la pynsngew ïa kata bad yn sa don ka jingïakynduh bad u Myntri Rangbah.
Hynrei ka la ong ba kam lah ban ong lano kan don kata ka jingïakynduh tangba ka bynta jong ka, ka long ban sngap ïa kaba la pynsngew bad ban rah ïa kata ka jingpynsngew sha u Myntri Rangbah.
“Ïa kane ka kam yn sa ïakren bad kat kaei kaba ïakren yn sa ïathuh pat,” ka la ong.
Haba kylli balei ka Sorkar ka dang kwah ïakren haba ka la dep ong ban nym ïakren bad ka VPP halor ka jingdawa ban thung biang ïa kita ki ophisar ba la shongthait kiba la shah weng, ka Kong Ampareen ka la ong ba ha ka synshar paidbah ka don beit ki jingpynsngew na kano-kano ka kynhun, bad hap ban sngap ïa kita ki jingpynsngew. Hynrei ka la ong ba ban poi sha ka jingsngewthuh, bad ïoh jingshai ïa kiei-kiei ki bym shai, ka dei lyngba kaba ïoh ban ïakren.
