Jowai, K’Lyngkot 22
Ki riewngeit na ka niam Hindu ha Jowai ha ka 22 tarik Kyllalyngkot ki la shim bynta ha ka jingplie ïa ka Ram Mandir ha Ayodhya, Uttar Pradesh da kaba pyni lyngba ka TV ïa ka jingplie paidbah ïa ka Ram Mandir.
Nalor ki riewngeit Hindu la donlang ruh ki nongshah khot sngewbha ban sakhi ïa ka jingplie ïa ka Ram Mandir.
Ïa ka jinglehniam bad lehkmen ha Jowai kaba la pynlong ha Shiv Mandir Complex, Iawmusiang la pyndep da ka Vishva Hindu Parishad (VHP) Jowai.
La sakhi ba ki lynti synkieng jong ka Mandir la pynriam itynnad da ki syntiew bad hapoh ka Mandir la don ka jingnguh blei, tah tika bad teh tyllai puja ha ki kti.
Hadien ba la dep ban plie paidbah ïa ka Ram Mandir la sam ïa ki prasad bad sam jingbam ruh ïa baroh ki nongwan ïashim bynta ha Shiv Mandir.
Haba ïakren bad u Bholak Kumar Gupta u Secretary ka VHP, Jowai u la ong ka long ka sngi sah jingkynmaw ïa baroh ki riewngeit Hindu namar ba la lah ban plie ïa ka Ram Mandir hadien 500 snem. U la ïathuh ruh ïa ka khana lyngkot 500 snem mynshwa ba ju don ka Ram Mandir hynrei la shna noh da ka Masjid halor jong ka, da ki Syiem Mughal.
U la ai khublei ïa ki bor pynïaid shnong ka Iawmusiang kiba la ai jingbit ban pynlong ïa kane ka jinglehkmen, ki nongïalam ka Seiñraij Jowai, ki sahep sorkar ka District bad kiwei kiwei kiba don bynta ha kane ka jinglehniam.
