Shillong, K’Lyngkot 22
U Secretary ka Meghalaya Pradesh Congress Committee (MPCC), u Bah Manuel Badwar u la ong ba ym dei ban shu khynra Trading License kyndit-kyndit tang ha ka por ba la jan ilekshon bad kum ki paidbah ki ïoh bha ban kynthoh halor kane ka jingleh.
Haba kylli halor ka jingleh jong ka District Council ban khynra Trading License tang ha ka por shwa ka ilekshon, u Bah Manuel u la ong ba ka long kaba donkam ban khynra ïa ki Trading License hynrei ym pat ban khynra tang shisien san snem ba la jan ilekshon hynrei dei ban khynra na ka por sha ka por khnang ba kan long kaba itynnad bad lada khynra shisien san snem ka long kumba shu kyndit na ba thiah ha kawei ka sngi bad kynmaw ban leh, kumta kane ka jingleh kam long kaba itynnad bad kam ïahap.
“Lada phi pyntreikam ïa ka jingkhynra man la ka por, ka long kaba itynnad hynrei lada phi leh shisien san snem la long kumba shu kyndit thiah ha kawei ka sngi, phi kynmaw noh ban leh, kato kam itynnad keiñ bad kam ïahap keiñ”, la ong u Bah Manuel.
Haba kylli la hato u don jingmut ban ïakhun ïa ka ilekshon MDC ka ban sa long shen, u Bah Manuel u la ong ba u don ïa ka jingmut ban ïakhun ïa katei ka ilekshon namar ba ka ilekshon MDC kadei kawei ka jaka ai jinghikai hapoh ka District Council kaba shong nongrim bad kaba la shna da ka sorkar ban ai jingïada ïa ka Jaitbynriew.
U la ong ba ka jingkwah jong u ban ïeng ïa ka ilekshon MDC ruh ka long beit ba ki don kiei-kiei ha ka jingmut jong u ban mih bad treikam na ka bynta u paidbah.
Shuh shuh u Bah Manuel u la ong ba ka District Council hi ka la dei ka jaka ai jinghikai ka ban ai jingïada bad kum ki dkhot jong ka District Council, ki dei ban ai jingïada shisha ïa ka Ri bad ka jaitbynriew bad ban ïada ïa ka Jaitbynriew, ka long kaba donkam ruh ban don ki rukom treikam kiba kham pher.
“Ban shu ong ba ngin shu ïakhih ïa kaei-kaei kaba tang ban shu pynshongshit ïa ki paidbah kam dei te namar shisien ba ngi lah don ïa ki nongmihkhmat, nga tharai ki nongmihkhmat kim dei ban shu pynshongshit ïa ki paidbah hynrei phi dei ban trei bad pyni da ki kam”, la ong u Bah Manuel.
U la ong ba ka District Council ka la ïaid shakhmat ym ban ong ba ka District Council ka sahkut hajuh hynrei ka long kaba donkam pat ban ïaid kham kloi bad ban ïada ha kata ka rukom ban nym ailad ïa ki heh ki haiñ ba kin pynïaid.
