Shillong, K’lyngkot 22
Ka jingplie ïa ka Ram Temple ha Ayodhya ha Uttar Pradesh ha ka Lah Sngi U Blei ka la long ka jingkmen ïa ki riewngeit Hindu kiba don ha Shillong bad ha kiwei ki bynta jong ka Jylla ha kaba la sakhi ïa ka jingsatah bad stem kmur ki jaka bad ki kali da ki lama blei Ram.
Ha kylleng ki jaka la pynlong ruh ïa ka jingpyni paidbah ïa ka jingplie ïa ka Ram Temple lyngba ki kor bor ka juk stad mynta katba u Myntri Rangbahduh ka ri, u Narendra Modi u dang plie bad shimbynta ha ka jinglehniam kum ka jingplie ïa ka Ram Temple ha Ayodhya.
Ha Shillong, ki paid riewngeit Hindu ki la sieh lama blei Ram halor tnum ïing kumjuh ruh ha ki kali bad ha ki dukan bad rud surok ha kaba la stem kmur da ka rong shyrmit lyngba ki lama blei Ram. Ha Shillong, u Myntri ka Sorkar Jylla, u Bah A.L Hek u la leit ïashimbynta ha ka jingshah khot ban donlang ha ka jingïalang kaba pynlong ha Garikhana Gorkha Mandir ha kaba la donlang ruh u ophisar ka Sorkar Jylla u B.D.R Tiwari. U Bah Hek u la poi ïashimbynta ruh ha Milan Mandir RR Colony ha Rynjah. Ha Jowai la sakhi ïa ka jingïaid paidbah ki paid Hindu kiba la leit ruh sha wah Myntdu, kawei ka wah ha kaba la tong ïa ka um ban rah sha Ayodhya ban pyndonkam ha ka por ba tei ïa ka Ram Temple.
