Shillong, K’lyngkot 22
U Myntri ka Sorkar Jylla, u Bah A.L Hek u la ong ba u Myntri ka Sorkar Pdeng uba peit ïa ka tnat Korbar Ri, u Amit Shah u la ong ïa ki nongïalam ka BJP ha Meghalaya ban wan ïalam ïa ki nongïalam jong ki Balang Khristan sha Delhi na ka bynta ban ïakren shibun ki mat.
U Bah Hek uba la ïakynduh ïa u Amit Shah lem bad u President ka BJP, u Rikman Momin lem bad kiwei ki nongkitkam ha ka por ba u wan sha Shillong ha ka taïew ba la dep. U Bah Hek u la ong ba shibun ki mat la ïoh ban ïakren bad u Amit Shah kynthup halor ka Foreign Contribution Regulation Act (FCRA), ka jingdonkam jaka jong ka Balang Presbyterian ha Delhi, nalor ki jingdawa ba sahteng kum ka ILP bad ka jingithuh ïa ka ktien Khasi bad Garo.
U la ong ba na ka liang u Amit Shah da lade u la ong ba ka BJP kam jngai na ki Khristan bad kam pyrshah ïa ki Khristan ha kaba u la ong ruh ïa ki nongïalam ka BJP Meghalaya ban wan ïalam ïa ki nongïalam jong ki Balang Khristan sha Delhi ban ïakren ïa kiba bun ki mat.
“U ong ïa ngi ba kim dei ban jngai na ka BJP namar ka BJP ruh kam dei kaba pyrshah ïa ki Khristan bad ki dei ban wan ban ïakynduh bad u ha Delhi na ka bynta kiei ki jingdonkam,” la ong u Bah Hek. U la ong ba ïa ka jingdonkam jaka ka Balang Presbyterian ha Delhi la dep ïakren teng kham mynshwa ha kaba la ïakynduh bad ka tnat pynroi sor kumjuh ruh bad u Lieutenant Governor ka Delhi.
U la ong ruh ba u Amit Shah u la kren shai ba haba ïadei bad ka FCRA, kino-kino ki kynhun ki hap pynbiang bad ïaid katkum ka aiñ ha kaba u la ai nuksa ruh ba ki don ki kynhun kiba dei jong ka niam Hindu ruh ki ngat ha ka aiñ namarba kim ïaid katkum ki kyndon.
Kumta u la ong ba ka jingpynshitom katkum ka FCRA ka dei beit namarba kito ki kynhun kiba ïoh jingïarap na shabar kim lah ban pynbiang katkum ki kyndon.
Haba kylli kaei ka jingeh kaba u Amit Shah u pyni haba ïadei bad ka ILP bad ka jingithuh ïa ka ktien Khasi bad Garo, u Bah Hek u la ong ba na ka liang u Amit Shah u la ong ba ka Sorkar ka hap ïaid katkum ki kyndon treikam (policy) bad hap peit bha ïa kita.
