Nongpoh, K’Lyngkot 22
U President barim jong ka Indian National Congress, u Rahul Gandhi ha ka janmiet Lah Sngi U Blei u la wan poi ha Nongpoh ha ka jingïaid kjat kaba ar ka jong u, kaba la ai kyrteng ka Bharat Jodo Nyay Yatra kaba la sdang na ka jylla Manipur, Nagaland, Assam, Arunachal Pradesh, Meghalaya bad ter ter shaduh Maha-rashtra.
Ha kane ka sngi ïa u Rahul Gandhi la wan ban synran lang da ki hajar ngut ki paid nongkyrshan jong ka Congress kiba kynthup ruh ïa kiwei ki nongïalam ba hakhmat kum u Jairam Ramesh, u KC Venugopal, u Bah Vincent H Pala bad kiwei kiwei ki nongïalam ka seng na ka ri bad ka jylla.
Ha shwa ba u Rahul Gandhi un wan poi ïuh kjat ha Nongpoh, la sakhi ruh ïa ki hajar ngut ki paidbah kiba la ap kmang harud surok ban ïohi ïa ka durkhmat jong utei u nongïalam ka Congress uba wan ban ïaid kjat naduh ka phyllaw jong ka shlem treikam u District Transport Officer ka Ri Bhoi ter ter haduh ka madan Pahamsyiem, kaba dei ruh ka jaka kaba la pynlong ïa ka jingïalang.
Haba ai jingkren ha kane ka sngi, u Rahul Gandhi u la pyntip ba mynshem snem, u la pynlong ïa ka jingïaid kjat na Kanyakumari shaduh Kashmir ha ka jingjngai kaba 4000 kilometer ïa kaba la ai kyrteng ka Bharat Jodo Yatra bad pyntip ruh ba ka daw halor kane ka dei namar ka Bharatiya Janata Party (BJP) ka la pynjot ïa kiba bun ki rukom kiba ïadei bad ka jinglong kawei jong ka ri India.
Ka rukom pyrkhat pyrdaiñ ba baroh ki jaid niam kin ïa im suk im saiñ, ki jaidbynriew bapher bapher, ki ktien ki thylliej bapher bapher kin burom markylliang hapoh ka ri, ki la shah pynjot ha ka Rashtriya Swayamsevak Sangh (RSS). Kumta la donkam ban ïada ïa ka jinglong tylli jong ka ri lyngba kane ka jingïaid kjat kaba la ai kyrteng ka Bharat Jodo Yatra (BJY) na Kanyakumari sha Kashmir, la ong u Rahul.
U la pyntip ruh ba ha kane ka jingïaid kjat jong ka BJY, la sdang na ki rud duriaw bad pynkut shaduh ki lum bah jong ka Kashmir. Ha kine ki 4000 kilometer jong ka jingïaid kjat, u la ïoh ban sngap ïa ka sur jong ki nongrep, ki nongbylla, ki khynnah samla bad ki million ngut ki ‘riew paidbah. Dei hadien kane ka jingïaid kjat ba ki la don ruh kiba wan kren sha u kiba ong ‘phi la ïaid na Shathie sha Shatei, hynrei lano phin ïaid pat na Mihngi sha Sepngi? Kiba la kylli ruh kumno ka sur jong ki paidbah ka thaiñ Shatei Lam Mihngi, ki sur jong ka jylla Orissa, West Bengal, Uttar Pradesh, Manipur bad Bihar?
Dei hadien kine ki jingkylli kiba la buh da ki paidbah ba u Rahul Gandhi u la rai ban pynlong biang ïa kane ka jingïaid kjat ka ban sdang na ka jylla Manipur ïa kaba la ai kyrteng kum ka Bharat Jodo Nyay Yatra (BJNY) ka ban pynkut shaduh ka jylla Maharashtra, da kaba ïathuh ruh ba ki briew ki buh jingkylli, balei phi sdang na ka jylla Manipur?.
Ka daw kaba la pynlong ïa u ban sdang na Manipur ka dei ba ka rukom pyrkhat pyrdaiñ jong ka RSS bad ka BJP kaba la pynjot thiaw ïa ka jylla Manipur. Ka saiñ hima sima ban pynisih bad wanrah jingïakulmar ka la tar lyngkhot lyngkhai ïa ka jylla Manipur. Da ki spah ngut ki paidbah ki la duh ïa la ka jingim bad ki phew hajar ngut ki la duh ïa la ka jaka ka puta, ka ïing ka sem bad ka long shisha kaba shempap ban peit bad dei na kata ka daw ba ka seng Congress ka kwah ban phah ïa kane ka khubor sha ki paidbah ka ri India halor ka jingshem jingeh jong ki paidbah ka jylla Manipur.
U Rahul u la pynpaw ïa ka jingsngew thamula ba u Myntri Rangbahduh ka Ri wat hadien bun bnai, um shym la shimkhia satia ban leit ïuh kjat sha Manipur da kaba buh jingkylli, hato ki paidbah ka Manipur kim dei ki nong India? Da kaba bynrap ba wat hadien ba u Myntri Rangbahduh wat hadien ba u la leit ïuh kjat sha kiba bun ki jylla, hynrei tdot hi um treh ban leit sha ka jylla Manipur.
U Rahul u la ong ruh ba lada u Myntri Rangbahduh ka Ri u kwah ban pynsangeh ïa ki jingïakulmar ha ka jylla Manipur, u la lah ban pynsangeh tang hapoh lai sngi, da kaba bynrap ba lada u khot ïa ki shipai (Indian Army), u ngeit skhem ba ki lah ban leh ïa kata tang ha ki katto katne sngi. Hynrei ka jingshisha ka long ba um kwah ïa kata bad u kwah ba ka jylla Manipur kan kem ding bad ki paidbah katei ka jylla kin jynjar.
U la ong ruh ba ka jingïaid kjat BJNY kaba la sdang na ka jylla Manipur ka don ïa ka thong kaba shai ba wat lada ka jylla Meghalaya ka dei kaba rit haba ïanujor bad kiwei ki jylla kum ka Uttar Pradesh, hynrei hakhmat ka seng Congress, baroh ki jylla ki long kiba ryngkat bad donkam kumjuh.
Ha kane ka sngi, u Rahul u la ong ruh ba ka Congress kam don ïa ka jingpynïapher halor u khun ba na ka jylla Manipur, Meghalaya bad uba na ka jylla Uttar Pradesh, Bihar ne Tamil Nadu, da kaba ong ba baroh ki long hi kumjuh.
U la ong ruh ïa ka jylla Meghalaya dei ban synshar da ki nong Meghalaya, hynrei kumba long mynta la synshar na Delhi, bad ym lah ban pdiang ïa kane ka rukom da kaba bynrap ba ka ri ka mad ïa ka jingkyrduh kam kaba shyrkhei tam haba nujor bad ki sawphew snem kiba la leit noh.
U Rahul u la pynkynmaw ruh halor ka jingkynthoh jong u Myntri Kam Pohïing ka ri, u Amit Shah uba la kynnoh ba ka Meghalaya ka dei ka jylla kaba bamsap tam na baroh, hynrei tang hadien katto katne por u la ïatrei lang pat da kaba pynshai ba ka don ka jingbamsap ha ka kam khaïi dewïong, ka jingtwa jong ka tnum pyllun jong ka ïingdorbar thawaiñ bad kiwei kiwei kiba ki paidbah ki lah ban ïohi shai kdar.
Ha kaba ïadei bad ka jingbym rung ka ktien Khasi bad Garo ha Khyrnit ba Phra, u Rahul u la ong, wat hadien ba arphew ar tylli ki ktien ki la rung ha ka Khyrnit ba Phra, hynrei ha kane ka sorkar, ka ktien Khasi bad Garo kam don bynta satia da kaba ong ruh ba wat ïa ki bor jong ki District Council ruh, kane ka sorkar BJP ka sdang ban pynduh bor.
U Rahul u la ong ruh ba u kwah ban don ïa ka jingïadei kaba ïajan bad ki paidbah ka jylla Meghalaya da kaba ong, “Nga dei u shipai jong phi ha Delhi, ngan pynurlong ïa ki jingdonkam ki jong phi da kaba kren bad sngap ïa ki sur ki jong phi”.
