Shillong, K’Lyngkot 22
Ka University of Science & Technology, Meghalaya kaba don ha Bardiya, 9 Mer, ha Ri-Bhoi, ha ka Lah Sngi U Blei ka la pyntip sha ki heh ka seng Congress ba ka la weng noh ïa ka jingai jingbit ban pynlong jingïalang jong u nongïalam ka seng, u Rahul Gandhi, ha kane ka skulbah kaba dei ban long ha ka Sngi Ba-Ar.
Ha ka shithi ba la thoh da u Registrar jong katei ka skulbah sha u Bhupen Borah, Presi-dent ka seng Congress, Assam, ha ka Sngi Ba-Ar, la ong ba ka seng Congress na Assam ka la kyrpad ïa kane ka skulbah ba kan ai ïa ka Central Auditorium jong ka USTM ban pynlong ïa ka jingïalang jong u Rahul.
Halor kane, ka seng Congress ka la dep siew shwa T. 1 lak ban ïoh pyndonkam ïa ka Central Auditorium.
Pynban na ka liang u Registrar ka USTM u la ong ba ha ka minit ba khatduh, u Deputy Commissioner ka Ri-Bhoi u la phah da ka shithi sha ka skulbah bad ha kata ka shithi, la kren shai ba u Deputy Commissioner u khlem ai jingbit satia ban pynlong ïa katei ka jingïalang.
Ha kajuh ka por, u la ong ba ka skulbah kan sa khot ïa u Rahul ba un ai jingkren sha ki samla pule ynda la pynlong ïa ka tamasa jong ki samla. Nalorkata, u Registrar u la ong ba ka skulbah kan sa pynphai noh ïa katei ka T. 1 lak sha ka seng Congress.
Ha kaba ïadei bad ka shithi ba la thoh da u Deputy Commissioner ka Ri-Bhoi sha u MLA ka Mawhati, u Bah Charles Marngar, uba long ruh u President ka Ri-Bhoi District Congress Committee bad ïa kaba la ai lang ruh sha u Vice-Chancellor ka USTM, la ong ba ha ka Sngi U Blei, u Bah Charles u la phah ïa ka shithi pan jingbit na u Deputy Commissioner ban pynlong jingïalang ha USTM ha ka Sngi Ba-Ar.
Hashwa jong kane ka jingphah shithi jong u Bah Charles, u Deputy Commissioner u la ong ba ha ka 19 tarik Kyllalyngkot ka la don ka jingïalang halor katei ka bynta jong ka jingwan u Rahul bad ha kane ka jingïalang la don lang u MLA ka Umsning, u Dr Celestine Lyngdoh.
U Deputy Commissioner u la ong ba ha katei ka jingïalang la pyntip ba donkam ban pan jingbit bad ban ïoh ïa ka syrnod NOC na u Vice-Chancellor ka USTM bad u Rangbah Shnong khnang ban ïoh pynlong ïa ka jingïalang ha katei ka skulbah.
Hynrei, u Deputy Commissioner u la ong ba ha ka shithi ba la phah da u Bah Charles lyngba ka WhatsApp, kita ki syrnod NOC na u Vice-Chancellor ka USTM bad u Rangbah ki khlem don lang.
“Ngi la ai por ïa ki nongpynïaid ba kin phah ïa ki kot ki sla ba donkam, hynrei ki khlem lah satia. Namarkata, ka shithi ka long ka bym pat biang nadong shadong. Na kane ka daw, yn ym lah satia ban ai jingbit ban pynlong ïa ka jingïalang,” la ong u Deputy Commissioner.
Mynta ka miet, u Rahul u dang don ha Byrnihat namar lashai ka sngi, la pynbeit ba kan don ka jingïalang jong ka North East Congress Coordination Committee.
