Shillong, K’Lyngkot:
Ka Dorbar Shnong Mission Compound, Shillong ha ka 20 tarik mynta u bnai ka la pynlong ïa ka prokram pynkup burom na ka bynta ki briew kiba long kum ki shipai kiba la mih shakhmat ha ka por ka jingwan lynshop jong ka khlam jingpang Covid-19 hapoh ka jylla. Ïa katei ka jingïalang pynkup burom la pynlong hapoh ka ïingdorbar jong ka shnong.
Ha kane ka sngi la wan ban ïadonlang da u Deputy Chief Executive Member ka Khasi Hills Autonomous District Council (KHADC), u Bah Pynshngaiñ N. Syiem uba la long kum u kongsan ha ka jingïadonlang u Bah G.S Basan, Rangbah Shnong Mission Compound, u Bah Tomley M Rumnong Asst. Rangbah Shnong, ki ‘riew rangbah jong ka shnong, ki longkmie, ki khun samla bad kiwei-kiwei.
U kongsan Bah PN Syiem, haba ai jingkren ha kane ka sngi u la ïaroh ïa ki briew kiba la ïeng hakhmat na ka bynta ban ïakhun bad ruh ban ai ïa ki lad jingïada na ka bynta ki briew jong ka shnong ha ka por jong kane ka khlam kaba la sdang naduh u snem 2020 bad kaba dang bteng haduh u snem 2021 lyngba ka jinglen lade bad ka jingaiti met bad mynsiem na ka bynta ban trei ïa ki kam hapoh ka shnong ka thaw khnang ba ki briew jong ka shnong kin lait na ka jingshah ktah ha une u khñiang jingpang.
“Ngi hap ban ai ka jingburom ïa ki shipai kiba la ïeng hakhmat bad kiba la ai ka jingshakri kaba bha tam ha ka por Covid-19 bad nga ngeit skhem ba U Blei un ïai kyrkhu ïaphi ba phin dang ïai ïoh ïa ka mynsiem ka jingshakri na ka bynta ki por ba donkam hapoh ka imlang bad ka sahlang”, la ong u Bah P.N Syiem.
Ha kane ka sngi la ïoh ruh ka jingpynbyrngia da ki jingrwai kiba la ïashim bynta da ki khun samla jong ka shnong bad ïa ka jingpynkup burom la leh da u kongsan ha ryngkat ki ‘riew rangbah jong ka shnong bad kiwei kiwei.
