Shillong, K’Lyngkot 22
Ka Voice of the People Party (VPP) ha ka Lah Sngi U Blei ka la rai ban pynsangeh shuwa shipor ïa ka jingïakhih thung-kam biang ïa lai ngut ki ophisar ba la weng na ka Lokayukta hadien ba ka Sorkar Jylla ka la kular ban khot ïakren ïa ki nongïalam ka seng.
Ïa kane la pynbna da u President ka VPP u Bah Ardent M Basaïawmoit, hadien ba ma u bad kiwei ki MLA bad nongïalam ki la leit ban ïakynduh ïa ka Myntri ba khmih ïa ka tnat Aiñ ka Kong Ampareen Lyngdoh kaba la khot ïa ki MLA ka VPP ban ïakren ha kamra jong ka bad pyntip ba u Myntri Rangbah ka Jylla u Conrad K Sangma un sa ïakynduh shen ïa ki ha kine ki shisngi ne arsngi.
Kum ban shu pynkynmaw ba ha ka step Lah Sngi U Blei nalor ki lai ngut ki MLA bad ki nongïalam bad dkhot ka VPP la wan ruh ban mih shakhmat da u President ka seng, u Bah Ardent M Basaïawmoit, kiba la mih sha surok ban bteng ïa ka jingïakhih ban pynbor ïa ka sorkar ba kan thung kam biang ïa ki lai ngut ki ophisar kiba la shah weng kam ha ka sorkar na ka Meghalaya Lokayukta.
Ha kane ka sngi, naduh ka por mynstep la ïoh ban sakhi ba ka jingpahara jong ki pulit ka la long kaba jur bha ban ïaleh ban nym shah bad khanglad ïa ki nongïalam bad dkhot ka VPP ban tur sha Secretariat.
Hynrei na ka liang ki nongïalam ka VPP bad ki dkhot ki la rai ban shong hapdeng surok bad kham hadien katto-katne por la ailad ba kin shong ha jaka ïeng kali kaba don ha syndah ka Additional Secretariat. Tang hadien katto-katne por ba la ïaid shakhmat ka jingïakhih, ka sorkar jylla ka la khot ban ïakren lyngba ka Myntri ka Kong Ampareen Lyngdoh. Haba kren sha ki lad pathai khubor hadien ka jingïakynduh ïa ka Myntri, u Bah Ardent u la ong, “Ngi la sngew ban weng noh shwa shipor ïa ka jingïakhih ba kan sa don ka jingïalang bad u Myntri Rangbah ka jylla ryngkat ki nongïalam ka VPP lem bad ki heh ophisar ka Sorkar.”
U la ong, “Ngi tip thikna ba ka Myntri aiñ kam lah ban ai kano-kano ka rai bad ngim lah ban shim ruh ïa kano-kano ka rai hynrei ngi kwah ban phah ïa ka khubor kaba shai ba kum ka seng ngim kwah ban pynmih ïa kano-kano ka huri-hura namar ka rai jong ngi ban mih surok kam dei ban pynmih huri-hura hynrei ngi don ïa ki daw kiba biang haba ka Sorkar ka la shu weng kam ïa ki ophisar, ngi sngew ba ka dei ka kamram jong ngi ban shimkhia ïa kane ka kam bad ngim pdiang ïa ka jingpynshai jong ka Sorkar ba kaei kaba ka la leh ka dei namar ka jingthung ïa kine ki ophisar ka long pyrshah ïa ka aiñ”. U Bah Ardent u la ong ba ka jingïakhih jong ka VPP ka dei namar ba shah ktah ka Meghalaya Lokayukta, kaba tohkit ïa ki kam bamsap bad ban pynshitom ïa ki nongbamsap. Kumta lada don ba ktah ïa ka Lokayukta, ka VPP kan ïeng ban pyrshah bad kan pynbeit ban pynkhlaiñ ïa ka Meghalaya Lokayukta.
“Ngi la kren shai hakhmat ka Myntri ba kan pyntip ïa kine ki mat ba kongsan sha u Myntri Rangbah khnang ba ha ka jingïalang ban wan, ngin lah ban ïashong bad ïapynbeit ïa kane ka kam shisien pynbeit,” u la ong.
U Bah Ardent u la ong ba ka jingïakhih kan sa bteng biang lada ka Sorkar kam lah ban pynshong nongrim ïa ka rai ban weng kam ïa kine ki ophisar ka Lokayukta.
Ha kajuh ka por, une u nongïalam ka VPP u la maham ïa ki pulit, kiba kynnoh donkti ha ka ban ktah kti ïa ki MLA ha ka sngi ba nyngkong jong ka jingïakhih.
“Ka Assembly ka don ïa ka Privilege Committee, ki MLA jong ngi kin sa rah ïa kane ka kam. Ngim don eiei pyrshah ïa ki pulit, hynrei ngi dei ki nongmihkhmat paidbah bad la jied ïa ngi da u paidbah,” u la ong bad bynrap ba na ka liang jong ka VPP ka pynpaw ruh ïa ka jingpyrshah ïa ka jingtap durkhmat jong ki pulit kiba wan tehlakam ïa ki nongïakhih.
