Shillong, K’Lyngkot 23
Ka Meghalaya Pradesh Congress Committee (MPCC) ka la ther tyngeh ïa ka Sorkar Jylla halor ka jingbym ïoh jingbit u khlieh nongïalam barim ka Indian National Congress (INC), u Rahul Gandhi ban ai jingkren ha University of Science & Technology, Meghalaya (USTM) ha ka Lah Sngi U Blei.
“U Gandhi um dei ban ïakynduh tang ïa ki nongtrei ka Congress, ki kynhun ka imlang-sahlang, ym tang ïa ki samla hynrei u dei ruh ban ïakynduh ïa ki samla pule bad ki briew kiba don kajuh ka rukom pyrkhat ha USTM…balei hangne, namar kane ka skulbah ka don ïa ka ‘Hall’ kaba heh bad kaba lah ban rung palat 3000 ngut ki briew,” ong u President ka MPCC, Bah Vincent H. Pala haba kren sha ki lad pathai khubor ha ka Sngi Ba-ar.
U President barim ka INC, u Rahul Gandhi u la wan poi ha Nongpoh ha ka janmiet Lah Sngi U Blei na bynta ka jingïaid kjat kaba ar jong u, kaba la ai kyrteng, ka ‘Bharat Jodo Nyay Yatra’ (BJNY) kaba la sdang na Manipur, Nagaland, Assam, Arunachal Pradesh, Meghalaya bad ter-ter shaduh Maharashtra.
U Bah Pala u la ïathuh ba ki samla pule katei ka skulbah ki long kiba la khreh bad ïa ka prokram la pynbeit ban long ha ka por 8 baje mynmiet, hynrei ka Sorkar hapoh ka jingïalam ka NPP, UDP bad ka BJP hapoh ka Jylla, ki la kyntait bad kim shym la ai jingbit ban pynlong ïa katei ka jingïakynduh da kaba ai ïa ki daw ki bym shong nongrim.
Ha kajuh ka por, u la ong ba barabor haba don prokram ha skulbah, lada ka skulbah ka ai ka jingbit-NOC, la tyngkhap lang ïa kane ka jingai jingbit namar kumba ka long, kane kam dei ka jingïalap ilekshon bad ka Model Code of Conduct (MCC) kam pat sdang hapoh ka ri.
Haba kdew ba katei ka jingpan jingbit ka long tang na bynta ka jingshngaiñ, utei u nongïalam u la ong, “Kumta ka long kaba sngewsih, nga sngew ba kane ka pyni ba ïa ka Sorkar Jylla la bthah da ka BJP ha ka Sorkar Pdeng kumjuh na ki nongïalam ka thaiñ Shatei Lam Mihngi.”
“Kumta man la ka ‘vote’, man la ki rai haba ki briew ki ai sha ka UDP ne NPP, ka dei na bynta ka BJP. Kumta ki briew ki dei ban shai ha ka jingmut ba ha kane ka ilekshon ban wan, kano-kano ka ‘vote’ kaba ai sha ki bym dei Congress ka dei sha ka BJP,” u la ong.
Katkum ka jingsngew u President, u la ong ba ka jingbym ïoh jingbit u Gandhi ban ai jingkren ka dei namarba ba ki (Sorkar) sheptieng ïa ka Congress bad kumta khlem daw, ki kyntait ban ai jingbit ïa ka seng.
“U Rahul u kwah leit sha kane ka skulbah ym na bynta ban ïakren halor ki kam saiñ pyrthei hynrei na bynta ban ïakren bad ki samla pule kumno ban ai mynsiem ïa ki. Ka thong jong ka BJNY ka dei ka hok na bynta ki samla, ka jingïashim bynta jong ki, ka jingïakren bad ki paidbah, ki kynthei, nongrep, nongtrei bad kiwei-kiwei ki kynhun ka imlang-sahlang,” ong u Bah Pala.
Ha kawei ka liang, u la ong ba watla ki la shah khang ban ai jingkren ha USTM, hynrei ka seng ka la ïoh ban ïakren bad ki samla pule.
“Ki samla pule ki la wan, bad u Gandhi u la ïakren ruh bad ka North East Congress Coordination Committee hynne ka sngi,” u la ong.
Shuh shuh u la bynrap, “Kane kam shym la pynsangeh ïa ngi hynrei ka shu pyni ïa ka rukom pyrkhat jong ka Sorkar ha ka Jylla jong ngi ba ka shah pynïaid ha ka BJP namar ka BJP ka pyrshah ïa ka ‘Yatra’ jong u Gandhi bad kam kwah ba u Gandhi un ïadei bad ki briew.”
Nalor kane u la ong ba ki paidbah ki dei ban sngewthuh ba kane ka Sorkar kam don budlum bad la pynïaid ïa ka da ka Sorkar BJP na Delhi bad ki nongïalam na Assam.
