Shillong, K’Lyngkot 23
U nongïalam ka seng Congress, u Rahul Gandhi, ha ka Sngi Ba-Ar u la kam ba u la shah khanglad ban ïakren bad ki samla pule ka University of Science and Technology, Meghalaya (USTM) kaba don ha Ri-Bhoi kum shi bynta na ka jingïaid lynti jong u ba la ai kyrteng ‘Bharat Jodo Nyay Yatra’ hadien ka jingïoh hukum na u Myntri Korbar Ri, u Amit Shah, watla u khlem shim satia ïa ka kyrteng jong une u Myntri.
Ha kajuh ka por, u la ong ba ka u Myntri Korbar Ri u la bthah ïa ka shlem treikam jong u Myntri Rangbah ka Assam ba katei ka skulbah shimet (Private University) kam dei ban ai jingbit ïa u ban leit ïakren bad ki samla pule.
“Nga la kwah ban wan sha ka skulbah jong phi ban kren sha phi bad ban sngap ïa phi. Hynrei kaei kaba la jia ka long ba u Myntri Korbar Ri u la ïakren bad u Myntri Rangbah ka Assam bad na ka liang ka CMO ka la ïakren bad ki khlieh jong ka skulbah bad la ong ba u Rahul Gandhi um dei ban ïohlad ban ïakren bad ki samla pule,” la kynnoh u Rahul ha ka por ba u la ai jingkren sha ki samla pule nalor jong ka bos. Kane ka jingai jingkren jong u ka dei ha khappud Assam-Meghalaya.
Ha ka jingshisha, u Rahul u la dei ban leit ïakynduh ïa ki samla pule ka USTM ha Ri-Bhoi ha ka step Sngi Ba-Ar. Hynnin ka sngi, u la wan sha Nongpoh ban ai jingkren ha Madan Pahamsyiem bad u la sah miet ha Byrnihat.
Hynrei hynnin ka miet, u Registrar katei ka skulbah u la thoh sha u nongïalam ka seng Congress ha Assam ha kaba u la pyntip ba u Deputy Commissioner ka Ri-Bhoi u khlem ai jingbit satia ban pynlong ïa katei ka jingïakynduh bad ki samla pule. Na ka liang u Deputy Commissioner u la ong ba ki nongïalam ka seng Congress ki khlem ai lang ïa ka syrnod No Objection Certificate na ka skulbah bad na u Rangbah Shnong ha ka por ba ki la pan jingbit ban pynlong jingïalang ha USTM bad namarkata, u la hap ban pynsangeh ïa kata ka jingïalang.
Hynne ka sngi, ki nongïalam ka seng Congress lem bad u Rahul ki la hap ban ïakynduh noh ha kawei ka Hotel.
“Lada u Rahul Gandhi u wan ne u pep, kata kam dei kaba donkam. Kaei kaba donkam ka long ba yn ailad ïa phi ban sngap ïano-ïano ba phi kwah. Dei ban shah ïa phi ban im ïa ka jingim kaba phi angnud bad ym da kaba kwah da kiwei,” la ong u Rahul ïa ki samla pule nalor jong ka bos.
“Ki kwah ban pynlong mraw ïa phi hynrei nga tip ba yn ym don satia kano-kano ka bor kaba lah ban leh kumta,” u la bynrap da kaba kam ba kane ka la jia ym tang ha Assam, hynrei ha man la ki skul, kolej bad skulbah ha India ha kaba ki khynnah pule ki shah khang lad ban don la ki jong ki jingmut jingpyrkhat.
Ha kawei pat ka liang, u Myntri Rangbah ka Assam, u Himanta Biswa Sarma, haba kynthoh halor katei ka jingkynnoh jong u Rahul, u la ong, “U briew aïu – ka prokram ka dei ha Meghalaya, hynrei u tim u tla pat ïa ka Assam.” Ïa kane, u Himanta u la kynthoh ha rynsan ‘X’ ha ka ktien ‘Hindi’.
