Shillong, K’Lyngkot 23
Ka jingpynkhreh jong ki seng saiñ pyrthei bapher-bapher ïa ka ilekshon MP ka la nang ïaid shakhmat ha kaba ki la don katto-katne ki seng kiba la pynbna ïa ki kyrteng jong ki kyrtong ki ban ïa aireng ha kane ka ilekshon. Kumta ruh na ka liang ka seng Congress ka la phah ïa ki kyrteng jong ki kyrtong sha ka All India Congress Committee (AICC) ba kan ai ïa ka jingmynjur halor kane.
Haba kren sha ki lad pathai khubor ha ka Sngi Ba-ar, u nongïalam ka Congress, Bah Ronnie V. Lyngdoh, u la ïathuh ba na ka liang ka Election Committee jong ka Meghalaya Pradesh Congress Committee (MPCC) ka la shong ïa ka jingïalang ha ka 23 tarik mynta u bnai ban ïakren bad ïathir ïa ki aplikeshon ba la ïohpdiang na ki kyrtong kiba kwah ban aireng ha ka ilekshon MP shapoh ka Lok Sabha na Shillong bad Tura Parliamentary Constituency ka ban sa long shen.
U Bah Ronnie u la ong ba ka seng kam pat lah ban pynpaw ïa ki kyrteng jong ki kyrtong ki ban ïakhun ha kane ka ilekshon tad haduh ynda ka sengkmie ka la ai ïa ka jingmynjur. Lehse ha ka taïew kaba nyngkong jong u bnai Rymphang ka seng kan sa pynbna noh ïa kitei ki kyrteng jong ki kyrtong ki ban ïakhun na Shillong bad Tura Parliamentary Constituency.
“Tad haduh ba ngin da ïoh ïa ka jingmynjur, mynta ngim pat lah ban pynpaw ïa ki kyrteng hynrei ngi la ïohpdiang ïa ki aplikeshon bad ngi la shong ïa ka jingïalang jong ka seng ha kaba ngi la pynpaw ïa ki jingkwah bad ki jingsngew jong ngi halor ka jingjied ïa kitei ki kyrtong”, la ong u Bah Ronnie.
U Bah Ronnie u la pynpaw ruh ba ka seng Congress ka la long kaba pynkhreh ban ïakhun ïa katei ka ilekshon MP shapoh ka Lok Sabha na baroh artylli ki shuki.
Haba kylli la hato ka seng Congress kan lah ban khie khlieh biang sa shisien ha kane ka ilekshon MP, na ka liang u President ka MPCC bad uba dei ruh u MP ka seng napoh Shillong, u Bah Vincent H. Pala, u la ong ba wat la ka long kaba jwat hynrei u ngeit skhem ba lyngba ka jingtrei shitom jong ki dkhot bad ka jingshaniah na ki paidbah ïa ka seng, ka seng ka don ïa ka jingngeit kaba skhem ba kan sa lah ban jop biang wat ha kane ka sien kaba mynta ruh.
“Ka long kaba jwat hynrei ha kajuh ka por ruh, nga ngeit skhem ba lyngba ka jingtrei shitom ba wat la ki nongïalam ki la phet napoh ka seng bad ieh ïa ngi hynrei ha kane ka sien kaba mynta ruh da ka jingshaniah jong ki dkhot bad ki paidbah nongkyrshan, nga ngeit skhem ba ngin sa lah ban poi biang sha ka jingjop”, la ong u Bah Pala.
Haba kylli halor ka jingshah kynthoh jong utei u MP ba um ju kren eiei hapoh Parliament halor ka mat Inner Line Permit (ILP) bad ka jingdawa ban kynthup ïa ka ktien Khasi bad Garo hapoh ka khyrnit kaba phra, u Bah Vincent u la ong ba kata ka jingkynnoh ka long kaba bakla namar na ka por sha ka por u ju rah bha ïa kitei ki mat.
“Kata ka long kaba bakla namar ïa kita baroh ki jingdawa nga ju rah hapoh Parliament bad ki don hi ruh ki sakhi ba nga ju rah ïa ka mat ILP bad ka jingkynthup ïa ka ktien Khasi bad Garo hapoh ka khyrnit baphra na ka por sha ka por,” la bynrap u Bah Pala.
