Shillong, K’Lyngkot:
Ka seng Hynñiewtrep Youth Council (HYC) ka la ai por shiphew sngi ïa ka North Eastern Indira Gandhi Regional Institute of Health and Medical Sciences (NEIGRIHMS) ba kan shimkhia bad leh eiei halor ki jingdawa lym kumta kam banse ban ïalam ïa ki samla ban leit khang tala syndon ïa kane ka hospital.
Lah ban pynkynmaw ba ka HYC ka la buh hakhmat ki bor pynïaid ïa ki 6 tylli ki jingdawa kiba don ka jingïadei bad ka rukom thep bad pynrungkam hapoh ka hospital.
Ha ka shithi ba la phah sha u Director ka NEIGRIHMS, u President ka HYC Bah Roy Kupar Synrem u la ong, ka seng ka pyrshah jur ïa ka jinglong pyrshah riewlum ki policy thungkam ka NEIGRIHMS ha ki bnai ba la dep haba ïadei bad ka kabu thep kam ïa ki samla trai ri.
“Ngi kyrmen ba kum u khlieh duh ka NEIGRIHMS un shimkhia ïa ka jingdawa kiba dei ruh na ka bynta ka bha ka miat ki samla trai Ri bad ka Jylla baroh kawei bad ïa kine ki jingdawa dei ban pynurlong noh hapoh shiphew sngi,” la ong u Bah Roykupar.
Une u nongïalam ka HYC u la ong ruh ba lada ka NEIGRIHMS kam lah ban pynurlong, ka seng kan sa lum ïa ki samla trai Ri ban tur sha NEIGRIHMS ban khang tala syndon ïa ka hospital.
Shuh shuh u Bah Roykupar u la ong ba ka rai jong ka NEIGRIHMS ban khot thep kam Nursing Officers lyngba ka NORCET ka la pynduh mynsiem ïa ki samla trai ri ban ïoh kam nurse ha kane ka hospital.
“Namar kane ngi dawa ba ka jingkhot thep kam dei ban pynlong beit da ka NEIGRIHMS bad dei ban pyndam noh ïa ka jingkhot thep kam da ka NORCET naduh mynta,” u la ong.
U la ong, “Ka jingkhot thep kam na ka bynta ki kam bapher bapher hapoh kane ka hospital dei ban pynglong beit da ka NEIGRIHMS ym da kiwei pat ki kompeni ne agency na bar Jylla bad ki jingthep kam ki dei ban long beit hapoh Meghalaya ym shabar ka Jylla bad ki Outsourcing Agency ruh ki dei ban dei da kiba napoh ka Meghalaya ym na shabar”.
Ha kajuh ka por u la ong, ka seng ka dawa ruh ba baroh ki nongtrei Contractual bad Casual ki dei ban ïoh beit da ki samla trai ri kiba kot bor bad baroh ki nongtrei kum ki nurse kiba la trei slem hapoh kane ka hospital ki dei ban shah kynthup lang hajuh baroh bad bynrap ruh ba na ka bynta ki kam ha ki kyrdan Group B bad C, ka NEIGRIHMS ka dei ban mang lypa 80% ka bhah ïa ki samla ka Meghalaya.
