Shillong, K’Lyngkot 23
Ka Regional Democratic Alliance (RDA) kaba dei ka kynhun synrop jong ka United Democratic Party (UDP) bad ka Hill State Peoples Democratic Party (HSPDP) ha ka Sngi Ba-ar ka la sdang bad khap ribon ïa ka jingïalap ilekshon na ka bynta u kyrtong ïamonlang jong ki, u Bah Robertjune Kharjahrin ban ïakhun na ka Shillong Parliamentary Konstitwensi, da ka jingïalang pynithuh ïa une u kyrtong ha ka jingïalang ba la pynlong ha shlem treikam ka UDP ha Shillong.
Ha kane ka sngi, la pynithuh ïa u kyrtong ïamonlang sha baroh ki MLA, ki MDC bad ruh sha ki nongïalam jong baroh ar tylli ki seng saiñ pyrthei.
U Bah Robertjune haba ai jingkren ha ka jingïalang u la kdew ïa ki katto-katne ki mat ba u la pynkhreh ban hiar ïalap ilekshon, kiba kynthup ka jingdawa pyntreikam ïa ka ILP, ka jingpynrung ïa ka ktien Khasi ha ka Khyrnit Ba Phra, ki kam khappud, ka jingdonkam ban ïoh noh ïa la ka jong ka cadet, ka roi ka par, ka jingshah thombor jong ki paid Khasi ba sah ha Bangladesh bad bun bah kiwei pat ki mat, ki ban dei ki mat ban sa ïa bteng ban kren nangne shakhmat.
U Bah Robertjune uba dei ruh u nongïalam barim ka HYC u la ong, ka Shillong Parliamentary Konstitwensi ka dei ka konstitwensi kaba la sei ïa ki riewkhraw pyrkhat ha ki por ba la leit. Kumta wat la ka jingkit ka long kaba khia ban kit, hynrei u don jingkyrmen pat ba un lah ban kit ïa kane ka lyngkor jong ka jaidbynriew lyngba ka jingïatreilang.
U la ong, “Ka jingjied ïa nga kum u kyrtong da ka RDA ba kynthup ïa ka UDP bad HSPDP, wat la ngam dei uba la wan na ka longïing ba don jingïadei bad ki seng saiñ hima hynrei ban dei tang kum uta u khun rangli-juki, nga sngew ba phi long ki seng kiba peit bad buh hakhmat ïa u duk u suk, ki khunswet rangli.”
“Ngam kwah ban ïaleh ilekshon da kaba kdew ïa ki jingduna jong kiwei, ne ban pynthohbria ïa kiwei. Ngan ïaid sha ka ilekshon da kaba tyrwa ïa ki mat ki jura jong ka jaidbynriew, ka jaidbynriew kan sei tang uwei u briew bad lada ki paidbah ki jied da kaba pynshong nongrim da ka jingbang jong ka jingrwai ne pynshong nongrim da ka jingïasngew niam ne sngew bahaïing, ka mut ngi la bakla naduh ba sdang,” la ong u Bah Robertjune.
U la ong ba ka kamram jong ki nongïalam ha ka saiñ hima sima ka long ym dei ban pynleit pynsngew ha u paidbah ïa ki jingeh hynrei ban shim jingkitkhlieh halade ban pynbeit ïa kita ki jingeh. “Ngi dei ban wad ïa ki lynti ban lah ban weng ïa ki jingeh ym ban long u nongïathuh ïa ki jingeh sha ki paidbah. Kumta haba phi jied, da pyrkhat bad da pynshong nongrim halor ki mat kiba ngan tyrwa hakhmat jong phi,” u la ong.
U Bah Robertjune uba la dei ruh uwei na ki nongïalam seng, u la buh ka jingkyrpad sha baroh ki seng da kaba ong, “Na ka por sha ka por haba ïakhih, ngi ju ong ba ngim don ïa ki nongïalam ki ban pynsngew ne kren ïa ki mat dawa jong ngi ha dorbar Parliament, kumta mynta ka tyrwa ha phi ki seng ba ngan long ka sur jong phi ban rah ban ïakren ïa ki mat jong phi ha dorbar Parliament, lada phi ïakhih ha surok, ngan ïakhih ha Parliament.”
