Shillong, K’Lyngkot 23
Katkum ka khubor na ki pulit ha ka Sngi Ba-Ar, ka Mebaria Khongjee ka la ujor ba ha ka 8 tarik Kyllalyngkot ha ka por kumba 10:30 mynstep, ka la lap ba ki runar ki la leit prong sha ka dukan jong ka kaba don ha Polo bad ki la rong noh T. 30,000.
Ha kawei pat ka jingjia, u Origent Sangma na Shillong Club u la ujor ba ha ka 28 tarik Nohprah, 2023, u la lap ba ka la don ka jingsei pisa kaba u khlem ai jingbit kaba long T. 5,000 na ka ‘Bank Account’ SBI jong u. Nalorkata, ha ka step jong ka 6 tarik Kyllalyngkot, u la lap ba ka pisa kaba T. 1,500 ka la jah rngai katba ha ka 15 tarik Kyllalyngkot, ki runar ki la tuh T. 5,500 na ka kamra jong u.
U Akash Nandi u la ujor ba ha ka 15 tarik Kyllalyngkot, ki runar ki la rung sha ka ïing sah u bahaïing jong u kaba don ha Lama Villa, Block III bad ki la tuh la thiem na kane ka ïing.
Nalorkata, u Jesterfield Syiemlieh u la ujor ba ki runar ki la tuh ïa ka thuk-thuk jong u kaba la pynïeng hajan ïing ha Laitkor ha ka janmiet jong ka 20 tarik Kyllalyngkot.
Ha kawei pat ka jingjia, u Jophas Manner u la ujor ha ka miet jong ka 20-21 tarik Kyllalyngkot, ki runar ki la tuh ïa ka thuk-thuk jong u (ML-05W-7563) kaba la pynïeng ha Mawlai Lummawnei.
Shuh shuh u Shandip Shylliang, Jio Technician, u la ujor ha ka 18 tarik Kyllalyngkot ha ka por kumba 3:30 mynsngi, u la lap ba ki runar ki la tuh ïa saw tylli ki Battery kiba shongdor T. 289,900/- na ka jaka ba pynïeng ïa u ‘tower’ jong ka Reliance Jio ha ka shnong Nongtalang, West Jaiñtia Hills.
Ha kajuh ka por, utei u briew u la ujor ba ha ka 18 tarik Kyllalyngkot ha ka por 3:30 nohphai sngi, u la lap ba ki runar ki la tuh ïa san tylli ki Battery ba shongdor T. 361,475/- na ka jaka ba la pynïeng ïa u ‘tower’ ka Reliance Jio ha ka shnong Sohkha.
