Shillong, K’Lyngkot 23
U khlieh nongïalam ka Meghalaya Pradesh Congress Committee (MPCC), Bah Vincent H. Pala ha ka Sngi Ba-ar u la ong ba ka jingshah weng kam ba dang shen jong ki ophisar ka Lokayukta ka kdew shai ïa ka jingdonkti jong ka Sorkar Jylla.
“Ka Sorkar ka lah ban thung bad weng kam ïano-ïano. Kumta ngin ap la ka Sorkar kan thung ne em namar nga sngew ba kam ïahap na ka liang jong ngi haba ka Sorkar ka thung ïano-ïano bad weng kam ïano-ïano, ka dei ka kamram jong ka,” ong u Bah Pala.
Ha kawei ka liang, u la ong ba ka rukom ha kaba ki ophisar ka Lokayukta ki la shah weng na ka kam ka pyni shai ba ka Sorkar ka donkti (kaba jur) haba ïadei bad kane bad ka thad madan ïa ka rukom long jong ka sha kine ki ophisar.
“Kumta ngin ap, ngi peit la kin thung ne em hynrei nga la ïohi ïa ka kyrwoh na ka liang ka Sorkar. Nga sngew ba ngim dei ban kynthih noh mardor, ngin peit kumno ki thung, ki briew kiba kumno ki thung. Kaei kaba ki ong ka long ba ki kwah ba nym thung shuh ïa kiba la shongthait bad ban thung da kiba dang trei ne ki nongkitkam bathymmai…te kumta ngin ap ïa kane,” ong u President ka MPCC.
Katkum ki khubor ba la mih dang shen, la ong ba lai ngut ki IO ba kynthup ïa u Director of Inquiry & Prosecution, Bah J. Rymmai, lem bad ki Enquiry-cum-Investigating Officer – R. Pde bad Anil K. Sangma, ki la shah weng kam lyngba ka kyrwoh ha ka ‘WhatsApp’. Dei kitei lai ngut kiba la thad madan ïa ka jingkynnoh bamsap kaba la kot da ki klur tyngka ba la kynnoh donkti da uwei u MLA, Sanjay A. Sangma, uba dei ruh u kynum jong u Myntri Rangbah ka Jylla.
Katei ka kam bamsap kaba la kynnoh ka dei halor ka jingshna ïa ka Hostel na bynta ki MDC ka Garo Hills Autonomous District Council (GHADC) ha Tura. Kane ka projek ka shong dor palat T.6 klur.
Hadien ka jingtohkit, ka ïingbishar jong ka Lokayukta ka la mudui pyrshah ïa 9 ngut ki dkhot EC barim jong ka GHADC, 2 ngut ki kontraktor, u Sanjay Sangma lem bad Principal Secretary barim ka GHADC.
Nalor katei ka jingtohkit, la bud sa ka jingujor na u nongtrei mon sngewbha, u Kingstone B. Sangma. Ïa katei ka MDC Hostel, la bei tyngka da ka Sorkar Pdeng.
Kumban shu kdew hangne, ka Sorkar ka la thung ïa saw ngut ki IO ka Lokayukta ki ban mih bujli ïa lai ngut kiba shah weng kam ha u bnai ba la dep.
U Chairperson ka Lokayukta, Bah Bhalang Dhar halor ka jingai jingmut ka Sorkar Jylla u la thung ïa u Bah Israel W. Ingty kum u Director ka Inquiry Wing lem bad lai ngut ki dkhot – Challang G. Momin, John Clitzer bad Banïateilang Deingngan.
