Shillong, K’Lyngkot 23
Ha kawei ka jingjia kaba la pyntip kham dier por, ki BSF ki la ujor ba ha ka 19 tarik Kyllalyngkot ki la hap ban kawang da u bom ‘chili grenade’ ïa ki runar kiba la wan na Bangladesh bad ba la suba ba ki donkti ha ki kam khaïi be-aiñ ïa ki mar ki mata.
Katkum ka jingpyntip ki pulit, u Company Commander ka 181 Battalion BSF, Namchapara Border Outpost, u la ujor ba ha ka 19 tarik Kyllalyngkot ha ka por kumba 7:20 mynmiet, ki BSF ki la lap ïa ka jingïaid jong ki suba runar na Bangladesh kiba la don kumba 30-35 ngut, bad kumba 15-20 ngut ki suba runar na India.
La ong ba la lap ïa kitei ki runar katba ki dang kawang ïa ki byrni shini sha shiliang khappud nalor jong ka bynta ba la ker sainar ha BP No. 1131/1S bad BFL No. 34.
Na ka liang ki BSF ki la leit tur sha ka jaka ba don kitei ki runar, hynrei ki la shah tim shah tla da ki kyntien khlem akor ha kitei ki runar. La ong ruh ba ki runar na India ki la kawang da ki maw ïa ki BSF.
Namarkata, ki BSF ki la kawang da uwei u bom ‘chili grenade’ sha ka jaka ba don ki runar na Bangladesh, bad hadien kata, ki runar ki la phet krad. Kham hadien ki BSF ki la lap ïa ka shini kaba don 108 kilo na katei ka jaka.
Ha kawei pat ka jingjia, u Assistant Commandant, 193 Battalion BSF Mawpat, u la ujor ba ha ka 19 tarik Kyllalyngkot ha ka por kumba 10:30 mynstep, ki BSF ki la ïoh bat ïa lai ngut ki briew – Somison Sangma (24 snem), Jenel D Sangma (22 snem) bad u Gopla Bormon (25 snem) hajan ka jingkieng Ranikor ha South West Khasi Hills. Na kine ki briew la ïoh kurup ïa kawei ka pla ha kaba la suba ba la thep ïa 1,728 tylli ki kuli Yaba.
Sa ha kawei pat ka jingjia, ki BSF ki la pyntip sha ki pulit ba ha ka 21 tarik Kyllalyngkot ha ka por kumba 8:30 mynstep, ki runar ki la thang ïa kawei ka jingkieng dieng kaba don hapdeng ka Rongtilla bad Amsku, West Jaiñtia Hills, bad namarkata, ka jingkieng ka la julor malu-mala.
