Shillong, K’Lyngkot 23
U Myntri ka tnat Arts and Culture ka jylla u Bah Paul Lyngdoh u la pynshai ba ka jingshna bad pynwandur ïa ki sur jingrwai jong ka State Anthem ka dei kaba la shna bad pynshong nongrim katkum ki kyndon jong ka aiñ Meghalaya State Language Act, 2005, kumta kam shym la don satia ka jingkyntait ne leh shiliang ïa kano-kano ka ktien.
Haba kren sha ki lad pathai khubor, u Bah Paul u la pyntip ba ka Meghalaya State Language Act, 2005 ka dei kaba la ïoh ïa ka jingmynjur jong ka ïingdorbar thawaiñ ka jylla ha u snem 2005 bad ka la kylla long aiñ hadien ba ka la ïoh ka jingmynjur na u Lat ka jylla ha kajuh ka snem.
Kane ka jingpynshai jong u Bah Paul ka la long hadien ba ki la mih bun ki jingpynsngew bad jingkynthoh la ka long na ki seng ne ki nongïalam saiñ pyrthei bad khamtam lei na rilum Jaiñtia, kiba la pynpaw ka jingbym sngew ïahap halor ka jingbym rung ka ktien Pnar ha ka jingrwai State Anthem.
“Ka Sorkar ka jong ngi kam dei ba ka leh ha la ka jong ka mon hynrei ngi bud ïa ki aiñ ki kanun kiba ngi pyntreikam bad kaba la pdiang hi ka dorbar thawaiñ ka jylla ka jong ngi. Ha ka jingïadei bad ka state anthem namar ba ka dei ka ‘official anthem’ ka jylla, ki dei ban don kano-kano ka aiñ ka ban long ka nongrim halor ba ngi pynshong ïa kane ka aiñ, kata ka Meghalaya State Language Act, 2005,” la ong u Bah Paul.
Haba kylli, u Bah Paul u la ong ba ha ka jingïalang ka kynhun Myntri (cabinet) la buh ïa ki kopi jong ka Official Language Act ba kum ki dkhot kin tip. “Kam dei ka aiñ ba shna ma nga ne shna mano-mano ki riewshimet, hynrei dei ba la wanrah ha cabinet, na cabinet la rah sha ïingdorbar bad u dkhot ba kren ïa kata ruh u dei uba la don bynta lang ha kata ka cabinet. Kumta ngam kwah ban kren eiei shuh halor kane,” la ong u Bah Paul.
Ha kajuh ka por, u Bah Paul u la ong ba ka ktien Khasi ka dei ka jingthmu ban wanrah ïa ka jingïatylli ha ka jaidbynriew ha kaba wat ki riewkhraw na bynta ka Jaiñtia Hills ruh ki la ïalam naduh mynshwa ban pynrung ïa ka ktien Khasi ha ka Khyrnit ba Phra ka riti synshar ka ri. U la kynthah ïa kiba kynthoh, ba ha ka por ba shna ïa katei ka aiñ ruh baroh ki MLA kynthup na Jaiñtia Hills ki ïadon lang nalor ha ka kynhun Myntri kynthup ka seng Congress kaba ïalam ïa ka sorkar ha katei ka por.
U la ong ba kita kiba kynthoh bad kwah ban pynlong mat saiñ hima, ki dei ban sngewthuh bad tip bha ba ïa kane, ba ha kane ka snem ba la pynlong aiñ, mano ba don ha ka bor bad mano ba la ïalam ïa ka Sorkar.
Katkum ka Meghalaya State Language Act 2005, la ithuh ïa ka ktien Khasi bad ka Garo kum ki ktien sorkar bynrap ne ki associate official language nalor ka ktien phareng kaba dei ka ktien sorkar ha ka jylla.
