Shillong, K’lyngkot 23
U Myntri Rangbah ka Jylla, Conrad K Sangma, u la pynshai biang ba ka jingthung bujli ïa ki ophisar kiba dang don ha ka kam ka dei kaba la leh katkum ki kyndon ka Meghalaya Lokayukta bad u la ong ba u long uba kloi ban ïakynduh lada don kiba ïakynduh halor kane ka mat.
U Myntri Rangbah u la pynpaw ïa kane ha ka Sngi Ba-ar ka 24 tarik Kyllalyngkot 2024 haba buh jingkylli biang halor ka jingthung bujli da ki ophisar kiba dang don ha ka kam ha ka jaka jong ki ophisar kiba la shongthait na ka kam ban don hapoh ka Meghalaya Lokayukta.
U la ong ba naduh basdang haba thung ïa u Director of Inquiry ym shym la bud ryntih ïa ki kyndon; kaba mut ba la shu leh tang kum ka jingpynbeit kaba shipor khnang ban ïoh sdang ïa ki jingtreikam ka Meghalaya Lokayukta khamtam namarba kham duna ophisar khamtam namarba ki ophisar ki dei ban dei kiba la don ha kyrdan Secretary shaneng. Kumta u la ong ba kum ka jingpynbeit kaba shipor la leh ïa kane ha kaba la pynkhreh lypa ruh ban thung beit da ki ophisar kiba don ha ka kyrdan Secretary shaneng bad ka la shimpor shisnem ban ïoh kham bun ki ophisar kiba la kiew sha ka kyrdan Secretary.
U Myntri Rangbah u la ong ruh ba da kaba thung da ki ophisar kiba dang don ha ka kam, kawei ka long ba ka jingsiew ruh kam don namarba ki dei kiba don ha ka kam, hynrei ïa ki ophisar kiba la shongthait ka Sorkar ka hap ban don kyrpang ka jingpynlut shuh shuh namar hap siew tulop katba ïa kiba dang don ha ka kam, ki dei kiba la ïoh tulop lypa.
Haba kylli halor ka jingïakynduh bad ka seng saiñ pyrthei VPP haba ïadei bad kane ka mat, u Myntri Rangbah u la ong ba u long uba kloi ban ïakynduh lada don kiba ïakynduh halor kane ka mat.
Ka Sorkar ka la dep pynshai ba ki ophisar kiba la thung hapoh ka Lokayukta la weng namar ki dei kiba la shongthait na ka kam.
Ha ka jaka jong ki, ka ophis Meghalaya Lokayukta ka la jied ïa ki ophisar IAS kiba kynthup ïa u Bah IW Ingty kum u Director Inquiry bad lai ngut ki ophisar MPS kiba kynthup ïa u Shallang G Momin, John Clitzer A Sangma bad Baniateilang Diengngan.
