Nongstoiñ, K’Lyngkot 23
Hadien ka jingthwet kaba jur, ki pulit na ka thanat Nongstoiñ ha ka 23 tarik mynta u bnai ki la ïoh ban kem noh ïa u Rophius Puweiñ, 31 snem ka rta, ïa uba la suba jur ba u la siat pynïap ïa u rangbah ha Pyndengshahlang ha West Khasi Hills District.
Une u briew uba la shah kem, u dei na ka shnong Domwahlang kaba hap hapoh u pud u sam jong ka Pyndengshahlang.
U Superintendent of Police ka West Khasi Hills u Bikram Marak, MPS, u la ong ba ki pulit ki la kem noh ïa u Rophius Puweiñ hadien ka jingsuba jur ba u dei uba donkti ban siat ïap ïa u Nijilson Lyngkhoi, uba na ka shnong Marshillong ha South West Khasi Hills District ha ka janmiet jong ka 20 tarik mynta u bnai ha Pyndengshahlang.
Shuh shuh u SP u la ong ruh ba ki pulit ki la ïoh ban kurup ruh ïa ka suloi na utei u briew bad na ka liang jong ki pulit hadien ba kila lah ban pyndep ïa baroh ki jingdonkam, ki la rah noh ïa u Rophius Puweiñ sha ka ïingbishar.
Lah ban pynkynmaw ba ha ka janmiet jong ka 20 tarik u Kyllalyngkot, ki pulit ka Nongstoiñ ki la ïoh pdiang ïa ka jingujor na ki bahaïing jong u Nijilson Lyngkhoi halor ka jingsuba shah pynïap jong une u rangbah ha kawei na ki jaka hapoh ka shnong Pyndengshahlang. Hadien ba ki pulit ki la hiar sha katei ka jaka ki la lap ïa ka met ïap jong u Bah Nijilson kaba la thiah lyngktar harud surok ha Pyndengshahlang ha ryngkat ki dak mynsaw na ka shadem.
