Shillong, K’Lyngkot 23
Ka BJP ha Meghalaya ha ka Sngi Ba-Ar ka la kynthoh ïa u nongïalam ka Congress, u Rahul Gandhi, da kaba kynnoh ba ki kyntien jong u ki “dap da ki jingshukor jingpynbiej”.
Kane ka jingkynthoh na ka BJP ka long halor ka jingkren jong u Rahul sha ki paidbah ha ka jingïalang kaba la long ha Nongpoh ha ka Lah Sngi U Blei ha ka por ba u la wan rung sha Meghalaya kum shi bynta na ka jingïaid lynti jong u ïa kaba la tip kum ka ‘Bharat Jodo Nyay Yatra’.
“Ngi kylli ïa u Rahul Gandhi ban pynshai ha kano ka dur ba ka jinglong ka ‘history’, ka rukom im rukom sah ki nong Meghalaya ka shah thombor,” la ong ka BJP. Ka la ong ba ka BJP ka lah ban pynshai ïa ki kam kaba ka la leh naduh tynrai ha ki rukom bapher-bapher lyngba ki Morcha jong ka seng bad kumno kin lah ban ïarap ïa ka imlang ka sahlang bad ban kiew ki paid Meghalaya.
“Ym dei ba ngi kawang ktieh ïa ka Congress kaba la synshar ïa ka ri jong ngi kumba 40 snem eiei, ka BJP ka kdew ruh ba ki nongkitkam ka seng ka bun hapdeng ki trai muluk ka ri, na sor shaduh nongkyndong ki dang ïa kiew katba dang mih ki sngi,” la ong ka BJP.
Ka jingkylli ka long ba lada kum ka BJP ka la pynjulor ïa ka rukom im rukom sah ki paid Meghalaya kumno ki paid naduh na sor bad na sha kyndong ka ri Meghalaya ki wan ïasnohlang bad ka seng, ka la kam.
“Lada ngi leh sniew, ki nongkitkam jong ngi kin ym kiew man la ka sngi, ym ki nongkitkam ka Congress dang duh jait,” ka la ong.
Ka BJP ka la pynkynmaw ruh ïa u Rahul ba iwei-pa-iwei i ‘riewshlur jong ka ri Meghalaya ki la ïoh ïa ka jingpynkup burom bad jingkynmaw na ki paidbah.
“U Rahul Gandhi u la kren ba ki Khasi bad ki Garo kim don ha ka Khyrnit ba 8 tangba u klet pat ïa ki nong Jaiñtia – tang hangne la shai ba um pat tip bha shaphang ki tynrai ki briew ka Meghalaya, um don jingtip jingithuh ïa ki ‘riew paidbah, ka jinglong jong ka ri hi baroh kawei,” la kynthoh ka BJP.
Ka BJP ka kwah ruh ban tip bad ban kylli na ka Congress ba ka lah leh aïu ha ki 60 snem ba la dep ha ka por ba ka dang don ha ka bor synshar ha ka ri India baroh kawei bad ha ki shnong ki thaw.
“Balei u Rahul um pynmih ïa kita ki kyntien por ba u dang don ha ka bor, hynrei tang ki jingkylli bym don nongrim,” ka la bynrap.
“Tang ban shu pynkynmaw ïa u Rahul, ka jingleh donbor ka dei ka mat treikam jong ka Congress bad ki nongpynïaid ba hiar pateng kumjuh. Ka BJP ka ngeit skhem ba ka jingïatrei bad ka jingïadei jong ka Sorkar Pdeng bad ka Sorkar Jylla hi kumjuh ka la wanrah jingpher jingphuh ha ki rukom treikam bapher-bapher ha ka Thaiñ Shatei Lam Mihngi,” la ong ka BJP.
