Shillong, K’Lyngkot 23
Ka Maitshaphrang Movement ka la khot bad wer ïa ki paidbah ka bri u Hynñiewtrep ban wan ïashimbynta ha ka jingïakob thoh jingrwai ïeid Ri halor ka jingïatylli da kaba pyndonkam ïa baroh ki jait ktien jong ka jaitbynriew Hynñiewtrep ka ban kynthup lang ïa baroh ki jait ktien kum ka Khasi, Pnar, Bhoi, War, Maram bad Lyngngam.
Haba kren sha ki lad pathai khubor ha ka Sngi Ba-ar, u Bah Michael Syiem uba dei Convener jong ka Maitshaphrang Movement, u la ong ba kawei na ki saiñ pyrkhat kaba don hapoh ka Maitshaphrang ka dei halor ka jingïatylli jong ka Jaitbynriew kata hapdeng u Khasi, u Pnar, u Bhoi, u War, u Maram bad u Lyngngam bad ka ktien Khasi ka dei ka ktien kaba pynïateh song ïa ngi kum ka Jaitbynriew.a
U Bah Michael u la ong ba kum ka Jaitbynriew ngi long kiba donbok ban don ïa ka ktien Sohra kaba dei ka ktien kaba pynïasngewthuh lem ïwei ïa iwei bad kum ka jaitbynriew kaba la shah kerkut ha ki heh paid suda bad kum ka jaitbynriew kaba tang shitroh, kumta ka long kaba donkam ban wanrah ïa ki lad ki lynti ban pynïatylli kum ka Jaitbynriew.
“Ngi sngewsih ba katba dang mih ki sngi, ki don ki jingpyrshang kiba thmu ban pynpait ïa ka Jaitbynriew jong ngi, ki bor kiba nabar kumjuh ki bor kiba napoh kiba pyrshang ban pynpait bad pynpra ïa ka Jaitbynriew jong ngi”, la ong u Bah Michael.
U la ong ha kine ki khyndiat sngi la ïohi jingrwai ieid ri ne ka ‘State Anthem’ ba la pyllait da ka sorkar jylla, ki la mih shibun ki ki jingkynthoh namar ka jingbym kynthup lang ïa ka ktien Pnar ha katei ka jingrwai ieid ri. Kumta na liang u Bah Michael u la ong ba ïa kine ki dak ki shin kiba paw lada ym pynsngew bad pynbeit mynta, sa tang katno ka pateng ka ban sa wan kan sa nym tip satia ba ngi long kawei ka Jaitbynriew.
“Ki pateng ki ban dang wan, kin pyrkhat ba ki jaitbynriew Khasi, Pnar, Bhoi, War, Lyngngam bad u Maram ki dei la ka jong, ngi sngew ba ka por ka la dei mynta ba ngin pynïatylli kawei kum ka Jaitbynriew”, la ong u Bah Michael.
U Bah Michael u la ong ba ka Maitshaphrang Movement kan sa ai khusnam da ka song pisa kaba T. 30,000 sha ki nongjop jong katei ka jingïakob thoh jingrwai.
“Kane ka jingrwai ka dei ban kynthup lang ïa baroh ki jait ktien bad ngin peit ïa ka jingmut jong kane ka jingrwai ha ryngkat ka jingïahap kaba khring ïa ki paidbah ban ïa pyrkhat thymmai halor kane ka bynta”, la ong u Bah Michael.
Shuh shuh u Bah Michael u la ong ba yn ai por haduh u bnai Lber ba kin phah ïa ki jingrwai jong ki bad kin sa don da ki kynhun nongbishar ki ban bishar bad jied ïa ka jingrwai kaba sngewtynnad tam bad kaba don jingmut ka ban wanrah ïa ka jingïatylli jong ka Jaitbynriew.
“Lada kum ka Jaitbynriew ngim ïatylli, ngin nym lah ban shan bad katba ngi dang ïa pait ïa pra, khamtam kum ka jaitbynriew jong ngi kaba don tang shitroh kata ka mut ba sa tang 100 snem ka jaitbynriew kan long kaba ima”, la ong u Bah Michael.
