Shillong, K’lyngkot 23
Ka jingtih dewïong katkum ka buit stad saïan ka ban sa leh ha Jylla kan long katkum ki kyndon bad ki rukom kiba la buh da ka Sorkar Pdeng bad ka Sorkar Jylla.
Ïa kane la ïathuh da u Myntri Rangbah Conrad K Sangma haba buh jingkylli ki nongthoh khubor ha ka Sngi Ba-ar.
U la ong ba ynda ïa ki jingpynkhreh ban tih (mining plans) la dep mynjur da ka Sorkar Pdeng, kin sa poi sha ka Jylla bad hadien ba ka Jylla ka la pyndep ïa ki bynta kiba ïadei bad ka mariang kum ka jingpynsngew paidbah, hangta kan sa bud sa ki rukom kiba dei ban bud ryntih.
U la ong ruh ba ha ki katto katne ki khep, ka la poi sha ka bynta ba khatduh ban pynsngap paidbah bad la khmih lynti ba haba ki kyndon kiba ïadei bad ka Sorkar Pdeng ki la dep, bun kiba sah kin dei sa ki bynta bad ka Sorkar Jylla bad district bad la ngeit ba kan dep noh kham kloi.
Haba kylli kaba kumno kata ka rukom tih dewïong katkum ka stad Saïan, u la ong ba kine baroh kin long katkum ki kyndon ba la buh da ka Sorkar Pdeng bad Jylla ha kaba kin don ki shnat treikam jong ka Sorkar Pdeng kum ka Coal Ministry bad kiwei kiwei kiba ju donbynta ha ka rukom tih dewïong.
“Kan nym long kaba suk bad ki kyndon ki long kiba kham bun syrtap. Dei namar kane ka daw ba ka shimpor ban pyndep ban bud ïa ki jnit ki jnat ha kaba ka jingmut jong ka jingtih katkum ka buit stad saïan kiba wanrah ka jingshngaiñ ïa ka mariang bad ïa kiba tih dewïong.
