Shillong, K’Lyngkot 24
Ka Hynñiewtrep Integra-ted Territorial Organisation (HITO) ha ka Sngi Balang ka la leit ban buh da ka jingujor ha shlem treikam ka Superintendent of Police (SP) – Anti-Infiltration halor ka jingwan rung be-aiñ ki bar-jylla da kaba kynnoh siew pisa ha khyrdop peitngor kaba ha Byrnihat, Ri-Bhoi distrik.
“Ngi la dei ban ïakynduh ïa ka SP ka tnad Anti-Infiltration, hynrei namarba ka donkam, ngi la ïakynduh noh ïa u Reserve Inspector (RI) bad ngi la ai ïa ka dorkhas ne jingujor ba ka don ka jingrung be-aiñ jong ki bar-jylla,” ong u President ka HITO, Bah Donbok Dkhar haba kren sha ki lad pathai khubor.
Haba ïathuh ba ki la don ki jingujor na ki paidbah halor katei ka bynta, u Bah Dkhar u la ong ka seng ka la phah ïa ki dkhot jong ka ban leit jurip sha kita ki jaka bad la lap ba ki don shisha kita kiba wan rung be-aiñ bad kumta la phah phai noh ïa ki.
“Kaei kaba sngew phylla ka long ba kitei ki briew ki phla ha ki dkhot ka seng ba ki siew da ka pisa ban ïoh rung shapoh ka Jylla. Ka tnad Anti-Infiltration ka la ong ba kan sa leh ïa kaba donkam bad kan sa tohkit la ka dei ne em kaba shisha kumba la kam da uwei na ki bar-jylla,” u la ong.
Na ka liang utei u nongïalam u la ong ba ka seng kan ap katto-katne por haba ïadei bad kane ka kam bad lada ka tnad ba dei khmih kam long kaba beit ha ka jingshakri jong ka, kata ka seng kam banse ban hiar hi dalade ban leh ïa kaba donkam.
“Ngi kyntu ïa ka tnad Anti-Infiltration kumjuh ka tnad pulit ba ym dei tang ban shu ïa ïeng khyllew (show) ha sor ban khang ïa kiba ïakhih ban dawa ïa ka hok. Jin da ka tnad Anti-Infiltration bad tnad pulit ki la pyrkhing ïa ki khappud ban peitngor ïa ka jingwan rung ki bar-jylla kumba ki leh myn ha kane ba khang ïa ki paidbah kiba thmu wan sha ka jingïakhih ban dawa ïa ka hok, ngam tharai ba kin ïoh ban wan rung,” ong u President.
Ha kajuh ka por, ka seng ka kyntu ïa ki Dorbar Shnong, Seng Samla Shnong bad nongshong shnong jong ka Jylla khamtam ki paid ka Bri u Hynñiewtrep ba ki dei ban peitngor bha hapoh ka Jylla haba ïadei bad ka jingwan rung ki bar-jylla.
“Lada ngi shah kumne bad lada ka Sorkar lyngba ka tnad Anti-Infiltration ki shim da ka pisa kumba la kynnoh, kam bha ba ngin shong kli-kti – ngi dei ban mih bad lada ka Sorkar hi ka pulom, uwei-pa-uwei u nongshong shnong ka Jylla ki dei ban don mynsiem ban ïada na ka jingwan rung kyrthep ki bar-jylla hapoh ka Jylla jong ngi,” ong u Bah Dkhar
Ka seng ka la kyrpad ruh ïa ki paidbah ba kin pyntip sha ka seng lada ki i-shan khmat ïano-ïano.
Katkum ki dur khih kiba ka seng ka la ïoh ring, uwei na ki bar-jylla u la pynsngew ba u la siew T.6000 ban ïoh rung sha ka Jylla.
“Ngi la lap na By-pass bad haba ngi la kylli na kine ki bar-jylla, ki la phla hi ba ki la siew da ka pisa ha khyrdop peitngor ha Byrnihat,” bynrap u Political Secretary ka seng, Bah Gerry S. Marboh.
