Shillong, K’Lyngkot 24
Kum shi bynta ban tei bad pynlong ïa ka New Shillong Township (NST) kaba paka bad kaba la saiñdur bha, ka Sorkar Jylla ha ka sngi Balang ka la buh mawnongrim jong lai tylli ki surok kiba lam sha ka New Shillong Township ban pynsuk bad pyllait na ka jingkhapngiah ha ka leit ka wan.
Ki lai tylli ki mawnongrim ba la buh ha ka sngi ha ka jingïalang ba la pynlong ha Hotel Vivanta, Khyndailad, Shillong ki kynthup ïa ka surok Bellafonte sha NST ha ka jingmang pisa kaba long T.49 klur, Diengpasoh sha Shillong By-pass ha ka mang pisa ba T.55 klur bad na Bribah Mawpat sha NST ha ka mang pisa ba T.21 klur.
Ïa kine ki mawnongrim la buh bad plie da u Myntri Rangbah ka Jylla u Conrad K Sangma ryngkat ka jingïadon lang u Symbud Myntri Rangbah ba khmih ïa ka tnat PWD Bah Prestone Tynsong lem ki ophisar bad kiwei kiwei.
Kane ka jingbuh mawnongrim ka kynthup ruh ïa ka jingpynbha bad pynheh ïa ka surok Shillong-Diengpasoh sha ka 2-Lane, kaba long naduh 14 Km sha ka 21.20 Km.
Ka jingkhot ‘tender’ ïa kine lai tylli ki surok la khmih lynti ba kan sa long ha kine ki khyndiat taïew bad ka jingpyntrei ïa ki surok ruh kan sdang noh shen.
U Myntri Rangbah haba ai jingkren, u la ong ba kam dei tang ka jingdonkam ban pynbha shuh shuh ïa ka New Shillong Township hynrei donkam ruh ban pynbha ïa kane ka nongbah kaba biang bad paka.
Haba kubur ïa ka jingeh na ka jingkhapngiah bad dheng kali kali ha kane ka nongbah kaba dang roi na kawei ka por sha kawei pat, u la ong ba ka jingpynbit pynbiang bad ka jingrah ïa kiba bun ki ophis treikam kiba kongsan sha ka New Shillong kin sa ïarap shibun.
“Wat la bun ki jingpyrshang ki la don ha ki snem ba la leit, kane kan dei ka sien ba nyngkong, khamtam ha kine ar snem ba ngi la ïohi ïa ka lynti kaba la ïa plan bha ban lah pynurlong shisha ïa ka jingphohsniew ha ka ban pynduna ïa ka jingkhapngiah ka nongbah Shillong,” ong u Myntri Rangbah.
U la kren ruh halor ka jingdonkam ban pynjanai ïa ka sor Shillong bad ban nang pynmih ïa ki jingtei jong ka Shillong Township bad Administrative City shabar jong ka nongbah. U Conrad u la ong na ka bynta ban lah ban kot ïa kane ka thong ban ïoh ïa ki shnong ki thaw ne ka New Shillong Township kaba biang bad paka, donkam ruh ïa ka jingïatreilang jong ki shnong ki thaw, ba kin lah ban plan bha ïa ki surok syngkien bad na ka bynta kane, ka Sorkar ka kloi ban phah da ki technical expert ban ïarap ïa ki shnong.
“Ngi khmih lynti ba ha u bnai Risaw, ngin sa lah ban sdang noh ïa ka kam jong ka Secretariat ba thymmai bad ngi don jingkyrmen ba ha ki lai snem, ngin sa lah ban pyndep ïa kiba bun ki jingdonkam, khnang ba ngin lah ban pynkynriah noh ïa ka Secretariat sha New Shillong. Nga khmih lynti ruh ba kumba 30 haduh 40 persen jong ka jingkhapngiah ka dheng kali ruh kan sa lait hadien jong ka jingpynkynriah ïa ka ïingdorbar bad ki ophis sorkar sha New Shillong, ha kaba ka dheng kali ha kane ka nongbah ruh kan sa kham duna noh. Kane ka dei ka jingïohi ka jong ngi, ha kaba ngi la trei shitom bad kine ki 3 tylli ki surok kin dei kiba donkam bha,” la ong u Conrad.
U la ong ruh ba ki don ruh shibun ki projek ki ban sa plie mynta u snem ba kynthup ïa ka Integrated Command and Control Center (ICCC), ka ban peitngor ïa ka sor Shillong baroh kawei lyngba palat 300 tylli ki camera bala pyndait kum shibynta jong ka Smart City project.
Kawei pat ka projek ka dei ha Golf Link bad ha ka jingïatreilang bad ka Golf Association, yn shna ïa ki park, ki jaka lehkai Adventure Sports bad ka jaka ïa ki paidba ba kin shong bad ïaid kai, u la ong bad bynrap ba ka Shillong kan sa ïohi ïa ki jingkylla dur ka bym pat ju ïohi mynno mynno ruh.
U Symbud Myntri Rangbah Bah Prestone Tynsong u la ong ba ka Sorkar kan ai ka jingkyrshan sha ki Rangbah Shnong bad ban ïarap ha ka jingplan ban pynwandur ïa ki jaka sor kum ki jaka ba la pynwandur bha katkum ka juk (modern planned areas) khamtam ha kaba ïadei bad ka jingshna bad ot surok haba ki die jaka puta.
