Nongpoh, K’Lyngkot 24
Da ka mynsiem jong ka jingsngewkhia halor ka jingkylla jong ka mariang sawdong sawkun bad khamtam eh hadien ba la paw katkum ki kaiphod ba ka Byrnihat ka dei kawei na ki jaka kaba dap da ka lyer kaba jaboh tam hapoh ka ri India, u MLA ka Jirang u Bah Sosthenes Sohtun ha ka sngi Balang u la lum ïa ki ophisar sorkar ha IB Byrnihat na ka bynta ban ïamir jingmut ban thaw ïa ki lad ki lynti kumno ban ïoh biang ïa ka lyer khuid hapoh kane ka thaiñ.
Ki ophisar sorkar kiba la ïadon lang ha kane ka sngi, ki kynthup ïa u Bah S Swer, Senior Scientist ka Meghalaya State Pollution Control Board (MSPCB), u Bah Eric Kevin Dkhar, Assistant Commissioner ka Ri Bhoi District bad kiwei kiwei. Ha kane sngi la ïa don lang ruh u MDC ka Jirang u Bah Victor Rani.
Kum ban shu pynkynmaw khyndiat, ka Centre for Research on Energy and Clean Air (CREA) ha ka kaiphod kaba la pynmih ha ka 10 tarik u Kyllalyngkot 2024, ka la pynpaw ba ka thaiñ Byrnihat ka dei ka jaka kaba dap ïa ka lyer kaba jaboh tam hapoh ka ri, da kaba tam ruh wat ïa ka sor bah kum ka Delhi, Noida, Mumbai bad kiwei kiwei.
Haba kren sha ki lad pathai khubor hadien ka jingïalang, u Bah Sosthenes Sohtun u la pynpaw ba ka jingthmu ba kongsan jong ka jingïalang ka long ban ïakren sani halor kumno ban thaw ïa ki lad ki lynti ban shimkhia na ka bynta ban pynduna ïa ka jingmih jong ka lyer jaboh.
U la ong ruh ba ha kane ka sngi, la ïakren ïa bun ki bynta bad ki lad ki lynti bad kawei na kine ka long ba ka MSPCB kan sa shimkhia ban wad ïa ki daw tynrai jong ka lyer jaboh lyngba ki jingwad bniah bad ban shim pat ïa ki lad ki lynti kiba donkam.
U Bah Sosthenes u la ong ruh ba ka jingdon jong ki karkhana ne ki jingthang plastic kam dei tang na u pud u sam ka Meghalaya, hynrei u la pyntip ruh ba ki don shibun ki karkhana kiba don sha shiliang, kata kiba hap sha ka jylla Assam.
