Shillong, K’Lyngkot:
U President ka Meghalaya Pradesh Congress Committee (MPCC), u Bah Vincent H. Pala u la ong ba ka niam ka dei hapdeng u briew bad u Blei bad kam ïahap satia ban ïakhleh ïa ka niam bad ka saiñ-hima namar ba ka saiñ-hima ka dei kaba don jingïadei bad ka aiñ-ka kanun, ka riti synshar ka ri bad kiwei kiwei kiba ïadei bad u paidbah.
Haba kren sha ki lad pathai khubor ha ka Sngi Ba-ar ha kaba ïadei bad ka jingpynïapher niam u Myntri Rangbahduh ka ri, u Narendra Modi, na ka liang u Bah Pala u la ong ba ka long kaba sngewsih pat ba ka seng Bharatiya Janata Party (BJP) kam pat lah ban pynurlong bad bud ïa ki mat treikam kiba ka la khlei hynrei ka la shu ïaleh tang ban pynngop bad pynthame ïa ki paidbah bad ïa ki katto katne ki kynhun lyngba ka niam.
“Nga tharai kaei-kaei ba ka leh, ki paidbah ki sngewthuh kham bha, ngi kyrshan bad burom ïa kino-kino ki niam namar baroh ki don ïa ka hok ba kin jied bad bud ïa ka niam kaba ki kwah”, la bynrap u Bah Pala.
U la ong ba kane ka jingleh jong ka seng BJP ban rah tang ïa kawei ka jait niam ka la pynlong ïa kiba bun ki nongïalam kiba hakhmat bad kiba dei ki riewngeit Hindu ba kin pynrem halor kane ka jingleh jong ka BJP.
