Shillong, K’Lyngkot 24
Ka President jong ka Mahila Morcha ka seng Bharatiya Janata Party (BJP) ka Kong Susuki Pariat haba pynpaw ïa ka jingsngewsih halor ka jingbym shym la kynthup lang ïa ka ktien Jaiñtia ha ka State Anthem, ka la ong ba ka sorkar ka dei ban burom lang ïa ka ktien Jaiñtia.
Ha ka kyrwoh khubor ba la pyllait, ka Kong Pariat ka la ong, “Kumba ngi tip ïa kane ka mat la dep ban rah ruh da u Myntri ka seng BJP u Bah A.L Hek ha ka jingïalang ka kynhun Myntri (cabinet) tangba ka sorkar kam shym la sngap.”
Ka Kong Pariat ka la ong, “Ïa ka Meghalaya ngi tip ba la phiah ha ki lai tylli ki thaiñ, kata ka Khasi Hills, Jaiñtia Hills bad Garo Hills, te kumta ha ka jingsngew jong ka seng, ka jingrwai ruh dei ban don lai jait ki ktien, kata ka Khasi, Jaiñtia bad Garo.
Kane ka nongïalam jong ka Mahila Morcha ka BJP ka la ong, hapoh ka ktien Khasi ki don bun ki tnat ktien, kum ka ktien War ne Maram ne Bhoi bad ka ktien Khasi ka dei ka ktien kmie ïa kito ki tnat ktien. Katba ka ktien Jaiñtia ka dei beit ka juh la ka dei ha Jowai ne Amlarem, Sutnga, Wahïajer, Shangpung la pyndonkam beit tang ka ktien Pnar.
Ka la ong ba ka ktien Garo ruh ki kren kumjuh la ha Tura ne Williamnagar, te kumta ka sorkar ka dei ban burom lang ïa kane.
