Shillong, K’Lyngkot 23
Ym don ban poi pyrkhat bad mutdur ba ka kynhun rwai bad tem ‘Ka Sur Na Nongkyndong’ kaba ki dkhot ki dei tang ki nongrep bad nongbylla kiba dei na ka shnong Lynshing bad ki shnong marjan kaba hap ha Mawkynrew constituency, East Khasi Hills district ba kin sdang ban paw ha kane ka juk haduh ba jan man ka sngi ki la shah khot rwai ha ki jaka khawai khamtam ha kane ka por tlang.
Ïa kane kynhun la sdang ban seng ha u snem 2000 ha Lynshing hynrei ha kito ki por kam pat paw pyrthei namar ba duna ha ka ïoh ka kot hynrei da ka jingtrei shitom la lah ban pynsngewtynnad ïa ki paidbah.
Haba ïoh ban ïakren bad u Bah Raison Nongrum uba bat kum u President kane ka kynhun tem, u la ïathuh ba ha kaba nyngkong ki dkhot ki don 14 ngut hynrei la thung biang sa ïa ki nongkitkam bad baroh ki long 20 ngut.
U la ïathuh ba naduh u snem 2000 kaba la ïaid lynti haduh mynta, ka jingshah rwai ha ki jaka khawai ban tem bad ban rwai ka la long man ka sngi khamtam ha ka aïom tlang.
U la pyntip ba ka rukom tem ka long da ka mandolin, Biolin, Guitar, ka put sla bad kiwei de.
“Ngam poi pyrkhat haba ka kynhun jong ngi ka la leit tem ha Martin Luther Christian University (MLCU) ha kaba u nongput sla u la shah khot biang bad kylla long kum nonghikai ha katei ka skul bah” u la ong.
U la ïathuh ba ïa kane ka sap tem ka dei kaba la ïoh pateng na ki longshwa namar ha Lynshing ka dei kaba tbit bha ban tem na ki sur hyndai.
U Bah Raison u la ïathuh ba u nongrwai khmat jong ka kynhun u Bah Waibha Nongrum u don ïa u ryndang uba siang ka dei kaba u don ka sap dalade hi.
“Haba ngi thaw ïa ka kynhun ka long ban rwai ïa ki jingrwai nïam lada shah khot ha ki jaka khawai hynrei lada ki trai iing ki kwah ban rwai ka imlang ka sahlang bad jingrwai jingieid ha ki jaka ïathoh ngi hap ban rwai namar ka jaka ïathoh ka ïasnoh bad ka jingieid” u la batai.
Shuh shuh u la ïathuh haba ïadei bad jingrwai ‘Kynding’ u la shah ‘call’ ha ka Jessie Lyngdoh ban rwai ha ka music video jong ka bad mar mar u la pdiang beit lada dei ka jingrwai bym ktah matïong ïano ïano.
U la pynpaw ka jingsngewkmen ba man ba shah khot ha ki trai ïing ki kwah ban phah rwai ïa kato ka jingrwai (Kynding).
