Shillong, K’Lyngkot 24
U President rangbah jong ka Voice of the People Party (VPP), u Bah Ardent Miller Basaïawmoit, u la ther tyngeh ïa uwei u ‘khynnah samla’ hadien ba u la ong ba lada dei ma u ha ka jaka u Bah Ardent un nym ujor FIR ïano-ïano kiba kynthoh pyrshah ïa u bad un shim ïa kitei ki jingshah kynthoh jong ki paidbah kum kaei-kaei ka ban nang ïai pynjanai ïalade ban long u shakri uba kham bha bad kham janai shuh-shuh.
Wat lada u Bah Ardent u khlem shim ïa ka kyrteng jongno-jongno, hynrei la sngewthuh ba ka jingkren jong u ka thew sha u kyrtong monlang ka UDP-HSPDP ha ka ilekshon MP, u Bah Robertjune Kharjahrin.
U Bah Ardent u la ong ba watla um pynsngap satia ïa kitei ki jingkynthoh kiba long pyrshah ïa u ha ki rynsan ‘social media’ hynrei na ka liang ki nongïalam ka VPP ki la pynpaw ba kim lah satia ban shu pdiang bad sngap ïa ka jingshah kynthoh u nongïalam ka seng namar katei ka jingshah kynthoh ka la long kaba tohmet haduh katta-katta ha kaba ki la kynthoh ba u Bah Ardent u la batbor ïa ki khun.
Kaba la pynlong ïa u Bah Ardent ban kren halor katei ka bynta ka dei hadien ba na ka liang jong ki nongïalam jong ka seng VPP ki la leit ban ujor pyrshah ïa katto-katne ki briew kiba kren tohmet ïa u nongïalam jong ki, ka la mih ka jingong pat na u kyrtong MP ka United Democratic Party (UDP), u Bah Robert June Kharjahrin ha ka jingïalang pynskhem jong ka Regional Democratic Alliance (RDA) ïa u kum u kyrtong ha kaba u la ong ba kum ki paidbah ki don ïa ka hok ba kin kren bad kynthoh hynrei kum ki nongïalam ki dei ban long kiba ïai shah lane ujor da ka FIR.
Shuh shuh ha katei ka jingïalang jong ka RDA, u Bah Robert June Kharjahrin u la kren siat ruh ïa u Bah Ardent da kaba u la ong ba ki Maram lei-lei ki kham rben sniehdoh shuh shuh hadien ba u Bah Ardent u la kren ha kawei na ki jingïalang kaba la long hapoh ka shnong Nongkhlaw ha kaba u la ong ba ki nong Nongkhlaw ki long kiba rben sniehdoh.
U Bah Robert u la ong ruh ba ïa ki jingkren jingkynthoh jong ki paidbah un shim kum ki jingai mynsiem ba un nang ïai trei bha shuh-shuh ïa ka kam bad ki jingshah kynthoh ki dei tang ki jingsneng ba malu-mala ba u Blei u ai hynrei un nym tynjuh pat palat ïa ka jinglah jong u ban ïaishah bad un shim ïa ki jingkynthoh ban pynjanai ïalade ban long u shakri uba kham bha bad kham janai.
Halor kane ka bynta, haba ai jingkren ha ka jingïalang pynsngewthuh paidbah jong ka seng halor ka jingshah weng kam jong lai ngut ki ophisar ka Lokayukta kaba la long ha Mawlai Petrol Pump ha ka Sngi Balang, u Bah Ardent u la ong ba watla um kwah ban ïakren saiñ hima sima ha katei ka jingïalang hynrei namar ba ki la mih ki briew kiba la kham sngew rangbah ban sneng ïa u bad kumta um banse ban hap pynshai halor kane ka bynta.
U Bah Ardent u la ther tyngeh ïa u Bah Robert June Kharjahrin ha kaba u la ong ba ka jingkren jong u Bah Robert ka thew beit ba u Bah Ardent u dang dei u briew uba buh kput ïa ki briew bad lada don mano-mano kynthoh pyrshah ïa u, u la ujor da ka FIR. Hynrei na ka liang u Bah Ardent u la ong ba ki la don da ki phew ngut ki briew kiba la kynthoh tohmet ïa u da ki snem bad um ju pynsngap satia ïa kita baroh hynrei namar ba ka jingkynthoh ka la long shaba palat kaba la kynnoh.
“Hynrei uta uba ong ba nga te ngan nym ai FIR, ngan shim ba ki dei ki jinghikai, nga shu kwah ban kylli jingkylli tang kane, phi tip kumno nga la shah kynthoh ha ka social media ïanga? Kiba bun kim tip namar ba la weng noh wut-wut ïa ka jingthoh hynrei ha katei ka jingthoh la thoh ba u Bah Ardent u batbor ïa ki khun,” la pynshai u Bah Ardent.
“Kata ka dei ka jinghikai? Kane ka dei ka jingkylli ïa une u khynnah samla. Kata ka dei ka jinghikai ban batbor ïa ki khun? Kumno uta u ong ba ka dei ka jinghikai? Ngin hikai ba ki kpa kin batbor ïa ki khun?”, la buh jingkylli u Bah Ardent.
Shuh shuh u Bah Ardent u la ong ba u ainguh ïa u Blei ba u don ïa ka bor ka jingïaishah bad ka ïing ka sem jong u ka la ai mynsiem ïa u ba un nym pynsngap satia ïa kitei ki jingkynthoh kiba long pyrshah ïa u.
“Nga ainguh ïa u Blei ba u ai ka bor ba ngan synshar ïalade, ha ka jinglong briew ka lah ing ka mynsiem hynrei nga ainguh ïa u Blei ba ka ïing ka sem, ka kurim bad ki khun jong nga ki kyrshan ïanga ba ngan nym pynsngew”, la ong u Bah Ardent.
U la ong ba haba ki don kiba mushlia ïa ka kam kaba u trei bad ïa kaei ba ka VPP ka leh khlem da sngewthuh, ka long kaei-kaei ka bym dei.
