Shillong, K’Lyngkot 24
Ka Voice of the People Party (VPP) ha ka Sngi Balang ka la pynlong ïa ka jingïalang paidbah ha Mawlai Petrol Pump ban pynsngewthuh bad pynshai ha kaba ïadei bad ka jingdawa jong ka seng na ka sorkar jylla ban sangeh ka jingtuklar ha kaba ïadei bad ka rukom treikam jong ka Lokayukta bad ruh ban thungkam biang ïa ki 3 ngut ki ophisar kiba lah shah wengkam.
Ha kane ka sngi la ïoh ïa ka jingkren na u nongmihkhmat ka Mawlai, u Bah Brightstarwell Marbaniang, u Bah Ricky AJ Syngkon kum kyrtong ka seng ban ïakhun ha ka ilekshon MP, bad u President rangbah ka seng, u Bah Ardent Miller Basaïawmoit.
Haba ai jingkren ha katei ka jingïalang, u Bah Brightstarwell Marbaniang, u la ong na ka liang jong ka seng ka la pynbna ba kan hiar thma pyrshah ïa ka bamsap namar ka seng ka sngewthuh ba ka jinglong jong ka jylla kumba ka long mynta ka dei namar ka jingbamsap bampong kaba la bam kruiñ ïa kane ka jylla.
U la ong ba ka Lokayukta ha ki jylla ka dei kata ka bynta ka ban peit bad khmih lada don kino kino ki jingujor ha kaba ïadei bad ka bamsap-bamngem kaba don hapoh ka jylla. Ka Lokayukta ka dei ban long kaba laitluid bad ka ban khmih ïa kum kita ki jingbamsap lada don kino-kino ki jingujor na ka liang jong ki paidbah.
U la ong ba ka Lokayukta ka long kaba donkam haduh katta-katta kaba la ailad ïa ki paidbah ba kin ujor lada don kano-kano ka jingbamsap bad lada ka Lokayukta ka lap ïa kino-kino kiba bamsap, ka pynshitom ïa kita kiba pyndonkam bakla ïa ka pisa.
“Dei na kata ka daw, ngi kum ka VPP ngi shimkhia ïa kane ka mat bad phi la ïohi ïa ka jingmih jong ngi shakhmat namar ngi sngewthuh lada ngim lah ban ïakhun ïa ka bamsap, ngin nym lah ban kyntiew ïa kane ka jylla jong ngi bad ngin nym la ban pynlong ïa ka kum ka jylla kaba dei ban long”, la ong u Bah Brightstarwell.
U la ong ba kum ka VPP kam kwah ban shu pynkhih paidbah khlem da pynsngewthuh ruh ïa ki paidbah halor ka jingïakhih jong ka seng ha kaba ïadei bad ka jingshah wengkam jong 3 ngut ki ophisar ka Lokayukta ha ka sorkar.
“Kane ka jingïakhih jong ngi ka dei ka jingïakhih kaba ngi la sngewthuh ïa ka mat ban ïakhun bad ban ïakren bad ka sorkar ban dawa ba ka dei ban pynbeit ïa kine ki kynrum ki kynram kiba don hapoh ka Lokayukta”, la ong u Brighstarwell.
Na ka liang u Bah Ricky AJ Syngkon u la ong ba kum ka jylla ka la ïaid lynti la kumba 50 snem tam hynrei kam tip satia ïa ka lynti ba kan poi bad shano kata ka lynti kan ïalam.
U la ong ba ka la dei ka por jong ka VPP ba kan ïalam lynti ïa ki paidbah bad u la ong ba ka jingmih jong ka seng kam dei tang ïakhun ïa ka ilekshon hynrei ka seng ka don ïa ka jingthrang bad ka jingangnud ban leh eiei ïa ka ri bad ka jaitbynriew bad u la ong ba lada ngim don ka jingïohi jngai, ka Jaitbynriew kan sa shu jah rngai.
“Ngim kwah ba kane ka Jaitbynriew jong ngi tang 50 snem kan shu jah rngai noh bad ka la dei ka por ba ngin ïalam ïa u paidbah ka jylla nangne shakhmat ha ryngkat bad ka jingtikna shano ban leit bad kiei ki nongrim ban ïalam ïa u paidbah”, la ong u Bah Syngkon.
Shuh shuh u Bah Syngkon u la ong ba lada kum ki nongïalam kim don ïa ka jingïohi kaba jngai, ngin nym sngewthuh bad ngin nym tip shano ban ïalam bad kam don jingmut ïa ka seng ban mih shakhmat ban shu ïalam matlah ïa u paidbah.
U la ong ba ka jingmih jong ka seng ka long ban pynsngewthuh sha ki paidbah halor ki bynta bapher bapher bad ha ki khyndiat bnai ba lah dep, ka seng ka la mih shakhmat ban pynshai ha kaba ïadei bad ka bhah thungkam thungjam bad ha kaba ïadei bad kane ka bynta, ka seng kan ieh ha ka sorkar ba kan pynbha bad pynthymmai halor ka bhah thungkam thungjam jong ka jylla.
Shuh shuh u Bah Syngkon u la ong ba ha kane ka sien kaba mynta ruh, ka seng ka la mih shakhmat ban pynshai paidbah halor ka Lokayukta bad u la ong ka Lokayukta ka dei ka iktiar ka ban rat dyngkhong ïa ka bamsap hapoh ka jylla.
“Ka Lokayukta ka long kum ka iktiar ha ki kti jong nga bad jong phi kum ki paidbah pyrshah ïano-ïano kita kiba ngi don ka jingsuba ïa ka jingleh bym hok ka jong ki haba ki shong ha kato ka miej ban shakri ïa u paidbah”, la ong u Bah Syngkon.
