Shillong, K’Lyngkot:
U kyrtong ïamonlang jong ka Regional Democratic Alliance (RDA) kaba dei ka kynhun synrop jong ka UDP bad HSPDP, Bah Robertjune Kharjahrin, u la ong ba mano-mano ruh ki lah ban kynnoh bad kynthoh pyrshah ïa u namar ki don ka hok ban kren bad kynthoh pyrshah.
“Kam pher la phi kynnoh da kumne da kumtai ïa nga, ngan nym ujor, phi don ka hok ban kren ban kynthoh, naba lada ngi lah ban shah ngin ïai shah,” la ong u Bah Robertjune Kharjahrin haba kren ha ka jingïalang pynithuh ïa u kyrtong ïamonlang ba la pynlong da ki nongïalam ka RDA ha ka Sngi Ba-ar ha shlem treikam ka UDP ha nongbah Shillong.
“U don uwei u rangbah uba phi ong, ki Nongkhlaw ki long kiba rben snieh doh, ma ngi ki Maram lei ngi nang rben shuh shuh. Ngin ïai shah ngin ïai kynthoh, ngan shim ïa ki jingkren ki jingkynthoh ki jong phi tang kum ki jingai mynsiem ïa nga ba ngan trei bha shuh shuh. Lada nga la ngat 30 ne 40 tylli ki case na bynta ban kren ïa ka dawbah ka jaidbynriew, kam pat biang ïa phi ban pynshisha ba nga ïeit ri jaidbynriew, kumta ngan nang shim ïa ka jingkynthoh jong phi ban pynjanai ïa lade ban long uta u riew ïeid ri ba janai, bad ka ktien U Blei ruh ka ong ba ki jingshah kynthoh dei tang ki jingshah tynjuh,” la ong u Bah Robertjune.
Une u kyrtong ïamon lang u la ong ba kum ka RDA ki la shim ruh kawei ka rai, kata ban shim ka jingkitkhlieh ba ka jingïakren ïasuk hapdeng ka HNLC bad ka Sorkar India bad Sorkar Meghalaya kan poi sha ka bynta jong ka jingmih jong u soh ba don jingmut.
