Shillong, K’lyngkot 24
Ka Geological Survey of India (GSI) ka la pyni ba kam long satia ban tei jingkieng thymmai ha ka bynta ba sharum ne shaneng jong ka jaka ba den ïa ka pung Umïam.
Ka GSI ka la pyni ïa kane hadien ba ka Sorkar Jylla ha ryngkat ka National Highway Infrastructure Development Corporation Limited (NHIDCL) ka la don jingthmu ban tei da ka jingkieng kaba thymmai kum ka lad ban pynduna ïa ka jingïaid ki kali na ka jaka ba den ïa ka pung Umïam.
Kane ka jingpyni ka GSI ka lah ban long ba ka don ka jingma ban pynkhih ïa ka jaka hajan jong ka bynta ba den ïa ka pung Umïam.
Haba ïakren bad u Myntri ka tnat bording, u AT Mondal u la ong ba ka Sorkar Jylla kan thaw lad thymmai ban ïoh jaka kaba biang ban tei jingkieng thymmai khnang ban pynduna ïa ka jingïaid ki kali lyngba ka jaka ba den ïa ka pung Umïam ban lait na kino-kino ki jingma.
U Mondal u la ong ba u la dep don ka jingïakynduh bad ka NHIDCL bad ki dang pyrshang ban ïit nangno ka jaka ba biang ban tei ïa ka jingkieng kaba thymmai.
Ka Sorkar ha ka jingshisha, ka la dep pynkhreh ruh ban shna ïa ka surok Western Bypass ban pynduna ïa ka jingïaid ki kali na ka jaka ba den ïa ka pung Umïam da kaba shna pynheh ïa ka surok na Umsaw Khwan sha Mawmaram, hynrei ka bai jaka ban shna pynheh ïa kane ka long kaba rem haduh katta katta, bad ka Sorkar ka lah ban duh ïa kane ka projek kaba dei ban wan na ka Sorkar Pdeng.
U la ong ba ka jingkieng kaba rim kaba don hajan ka jaka ba den ïa ka pung Umïam ruh kam long satia kaba biang bad ka jinglong ka jaka ruh kam long kaba biang namar ka dam ka don shaneng bad marjan bad dam.
Ha kawei pat ka liang, u Mondal u la ong ba ka jingmaramot ïa ka jaka ba den ïa ka pung Umïam ka la ïaid shakhmat lyngba ka Dam Rehabilitation and Improvement Project (DRIP) da kaba ksam ïa ka jaka ba den ïa ka pung khnang ban theh dewbilat thymmai ban pynskhem ïa ka jaka ba den ïa ka dam.
Une u Myntri u la ong ba kane ka jingmaramot kan shimpor kumba 6 bnai bad la khmih lynti ban pyndep hashwa ban poi ka aïom lyiur.
Dang shen, u Mondal u la leit peit hi dalade ïa kane ka jaka ba dang ïaid ka jingmaramot.
La ong ba yn donkam ban ksam kumba 70 haduh 80 tylli ki thliew na ka bynta ban theh dewbilat thymmai ban pynskhem ïa kane ka jaka ba den ïa ka pung Umïam.
Shuh shuh u Mondal u la ïathuh ba ka jingïaid ki kali yn sa khang shisyndon ha ka sngi ba rah ïa ka jingkieng shajrong ban bujli ïa ki ‘bearing’ kiba don hapoh ka jingkieng kaba don ha jaka ba den ïa ka pung Umïam.
