Shillong, K’lyngkot 24
Ka Kynhun Myntri ka la ai jingmynjur ban pynbeit thymmai ïa ka rta rung kam ha ki katto katne tylli ki tnat treikam kynthup ka tnat pulit ha kaba la rai ba donkam ban pynrung kam da kiba dang kham samla ka rta kata yn sdang na ka 18-21 snem bad ka rta kaba kut ban thep kam ka long 27-32 snem ka rta.
Haba kren sha ki lad pathai khubor, u Myntri Sorkar u Bah Paul Lyngdoh u la ong ba kine ki tnat treikam ki kynthup ïa ka tnat Home (Police), ka tnat Excise, Registration, Taxation & Stamps, ka tnat Home Guards and Civil Defense, ka tnat Prisons & Correctional Services, bad ka tnat Forests and Environment.
U Bah Paul u la ong ba na ka bynta kine ki tnat treikam donkam ka jingrung kam kan sdang hapdeng 18 snem bad 21 snem ka rta bad ka rta kaba kut ban rung kam ka dei 27 snem haduh 32 snem ka rta.
U la ong ba ka rta kaba kut ban rung kam hapoh ka tnat ERTS ka dei haduh 27 snem ka rta, 32 snem ïa ka tnat Civil Defense, 30 haduh 32 snem ïa ka tnat forest and environment bad haduh 27 snem hapoh ka tnat pulit (Home Police).
Ha kine ki khyndiat taïew, u Bah Paul u la ong ba yn sa pynbna lait kam ha ki katto katne ki tnat, palat 3,000 tylli ki kam ha ka tnat pulit bad 500 tylli ha ka tnat Civil Defense.
U Bah Paul u la ong ba ïa kane la leh namar donkam ïa ki briew kiba dang kham samla ka rta ha ka por ba sdang ban rung kam.
Shuh shuh ka Kynhun Myntri ka la mynjur ruh ban pynkylla ïa ka Meghalaya Financial Service Rules 1989 namarba ki don bun tylli ki kyndon jong ki tnat treikam bapher bapher kiba la wanrah lyngba ki Office Memorandums (OMs).
Hynrei mynta ïa kine ki OMs yn bsut lang noh hapoh jong ka Meghalaya Financial Service Rules lyngba ka jingwanrah ban pynkylla ïa kane ka kyndon.
