Shillong, K’Lyngkot:
U President ka Hill State People’s Democratic Party (HSPDP) u Bah K.P Pangniang uba dei ruh u Secretary ka Regional Democratic Alliance (RDA) u la ong ba u sing un dang kyrhuh bad ka bom kan dang sawa jam haba u Bah Robertjune Kharjahrin un long u kyrtong ïamonlang ha kane ka ilekshon MP ban wan.
“Ha une u samla rangbah jong ngi, yn pynkhie im biang ïa kato ka mynsiem ieid ri bad ngin ym don jingpyrshah ne jingbeiñ ïa kiwei pat ki seng riewlum,” la ong u Bah Pangniang haba ai jingkren ha ka jingïalang pynithuh ïa u kyrtong ïamon lang u Bah Robertjune ba la pynlong ha shlem treikam ka UDP ha nongbah Shillong.
Une u nongïalam ka HSPDP u la ong ba ka RDA mynta ka la dap 7 snem, kata naduh ba la thaw ha u snem 2017 da ka HSPDP bad UDP. Ka jingthmu jong kane ka long ban pynskhem bad pynkhlaiñ ïa ka jingmut ki seng riewlum kumno ba yn lah pat ban ïoh bat ïa u lakam synshar ban synshar dalade ïalade.
“Kum ka RDA ngi la ïakynduh bad shong jingïalang la bunsien kumno ban ïaleh ban pynkhlaiñ, wat la kiba bun ki pyrkhat ba ki seng riewlum kin sa jah noh hynrei ngi don hangne ban pynskhem pynbha bad pynjanai shuh shuh ïa ka rukom treikam lyngba ka RDA, bad ha kaba ngi la poi sha ka thong ban pynbha ïa ka RDA lyngba u kyrtong MP jong ngi u Bah Robertjune u ban long u nongïasaid ha ïingdorbar Parliament,” la ong u Bah Pangniang.
Shuh shuh u la ong, “Baroh shi katta ngi la shong lang ha ka bos kumba ong uto u Maduh hynrei mynta kan sa wan ka por ba u Maduh un hap shong lang ne sdien bad ngi. Kane ka jingïatylli ka long ka jingsdang kaba bha tam, bad ba ngin don ka jingïatreilang ha ka MDC ilekshon ka ban sa long.”
U Bah Pangniang u la ong bad buh lypa ka jingkyrpad ba ka jingïatreilang ka dei ban long ha kata ka rukom ban nym don ka jingwohdong wohnia, bad ong ba ha ki konstitwensi ba khlaiñ ka UDP, u Sing un nym pynthut bad ha ka konstitwensi ba khlaiñ u Sing, ka UDP ruh kan leh kumjuh, bad ïa kane yn sdang na ka JHADC bad KHADC.
