Shillong, K’Lyngkot 24
Ka Dorbar Shnong Ladmawreng haba kyrpad ïa ki nongshong shnong bad khamtam ïa ki nongleit nongwan ba kin kiar na kaba bret pathar ïa ki jaboh jabaiñ, ka la kyntu ïa u nongñiah kawei ka kali, ba u dei ban wan mih hapoh une u bnai hakhmat ka dorbar shnong.
U Secretary ka shnong Ladmawreng u Bah Aiboklang Lyngdoh Nongbet u la ong ba na ka liang ka dorbar shnong ka kyntu ïa u trai jong kawei ka kali Alto kaba don ïa u number ML05-E-5944 ban wan mih hakhmat ka dorbar shnong hapoh une u bnai.
U la ong ba ka jingbthah ïa u trai kane ka kali ban wan, ka long ba na ka liang ki nongshong shnong dang ha kine ki taïew ba la leit, ha ka por 8 baje mynstep eiei, ki la ïoh ban bat ïa katei ka kali katba ka dang bret ïa ki jaboh ha kawei ka wah duid hynrei, ha katei ka por u nongñiah u la phet bak ryngkat ka kali na katei ka jaka.
U Bah Aiboklang u la ong ba kum ka shnong ka buh ka jingkyrpad sha ki nongshong shnong bad khamtam ïa ki nongleit nongwan kiba ïaid lyngba ka surok na Ladmawreng ba kin kiar ban bret ïa ki jaboh jabaiñ ha ki rud surok ne ki wah duid na ka bynta ban pynneh ïa ka khuid ka suba jong ka shnong ka thaw.
Ha kajuh ka por ka dorbar shnong ka la maham tyngeh ruh ba lada dang lap ïa ki briew kiba bret ñiut ne jaboh pathar hapoh u pud u sam jong ka shnong, yn pynshitom da kaba tyngeh katkum ki kyndon pynïaid shnong.
