Shillong, K’Lyngkot 24
Ka skulbah University of Science and Technology Meghalaya (USTM) kaba don ha Ri-Bhoi ha ka Sngi Balang ka la pynshai ba ym shym la don satia mano-mano ki bor kiba nabar kiba la phah khanglad ïa ki nongpynïaid ka skulbah ban ym ai jingbit ïa u nongïalam ka seng Congress, u Rahul Gandhi ban pynlong jingïalang ha kane ka shlem ha ka Sngi Ba-Ar.
Halor kane ka bynta, na ka liang katei ka skulbah ka la pynshai ba ki nongpynïaid ïa ka jingïalang na ka bynta ban wan u Rahul ha katei ka skulbah ki khlem ïoh jingbit na ka shnong bad u Deputy Commissioner ka Ri-bhoi, bad namarkata, la hap ban pynsangeh noh ïa ka jingïalang.
Katei ka skulbah ka la pyntip da kaba ong ba ka USTM ka ju sngewtynnad ban khot ïa kino-kino ki briew kiba don ha ka saiñ hima sima kiba don ïa ka nongrim ban pynïar ïa ka jingmut ki khynnah pule kiba long ki jingmyntoi na ka bynta jong ki, bad kumjuh ruh, ka USTM ka la khot ïa u President barim ka ri, u Ram Nath Kovind, bad kiwei de ki Myntri Rangbah, bad kumjuh ruh ki Myntri Sorkar na kiwei ki seng saiñ hima sima sha katei ka jaka pule ban ïakynduh bad ïakren bad ki khynnah pule bad ki nonghikai.
Ka USTM ka la ong ba dang shen, u President ka Assam Pradesh Congress Committee u la leit ban ïakynduh ïa ki nongpynïaid ka USTM ban pan wai ïa ka Central Auditorium jong ka skulbah na ka bynta ka jingwan jong u Rahul Gandhi, kaba la buh ha ka 23 tarik Kyllalyngkot, 2024.
Kumban shu pynkynmaw, u nongïalam ka seng Congress, u Rahul Gandhi ha ka Sngi Ba-Ar u la kam ba u la shah khanglad ban ïakren bad ki samla pule ka USTM kum shi bynta na ka jingïaid lynti jong u ba la ai kyrteng “Bharat Jodo Nyay Yatra” hadien ka jingïoh hukum na u Myntri korbar ri, u Amit Shah, watla u khlem shim satia ïa ka kyrteng jong une u Myntri.
Ha kajuh ka por, u la ong ba u Myntri Korbar Ri u la bthah ïa ka shlem treikam jong u Myntri Rangbah ka Assam ba katei ka skulbah shimet kam dei ban ai jingbit ïa u ban leit ïakren bad ki samla pule.
Ha ka jingshisha, u Rahul u la dei ban leit ïakynduh ïa ki samla pule ka USTM ha ka step jong ka Sngi Ba-Ar. Ha ka Lah Sngi U Blei, u la wan sha Nongpoh ban ai jingkren ha madan Pahamsyiem bad u la sah miet ha Byrnihat.
Hynrei ha ka miet jong ka Lah Sngi U Blei, u Registrar katei ka skulbah u la thoh sha u nongïalam ka seng Congress ha Assam ha kaba u la pyntip ba u Deputy Commissioner ka Ri-bhoi u khlem ai jingbit satia ban pynlong ïa katei ka jingïakynduh bad ki samla pule.
U la ong ba ki nongïalam ka seng Congress ki khlem ai lang ïa ka syrnod No-Objection Certificate na ka skulbah bad na u Rangbah Shnong ha ka por ba ki la pan jingbit ban pynlong ïa ka jingïalang ha USTM.
Kumta ka USTM ka la pynshai da kaba ong ba ki nongpynïaid jong katei ka skulbah ki khlem ïoh ïa kano-kano ka hukum ne ka khubor na ki briew kiba nabar ka jylla Meghalaya ban khanglad ïa ka jingwan u Rahul ban pynlong ïa ka jingïalang ha katei ka jaka pule.
