Shillong, K’Lyngkot 25
Ki thylliej ding kiba klang bha ki la ïoh ban bam duh naphang ïa katto katne tylli ki dukan kiba don ha ka thaiñ Happy Valley marjan bad ka State Bank of India (SBI) ATM.
Kane ka jingpluh bad kem ding jong kine ki dukan ka la jia ha ka janmiet jong ka Sngi Palei hynrei ym shym la lah satia ban tip ïa ka daw tynrai jong ka jingkem ding jong kine ki dukan.
La ong ba kine ki dukan kiba la shah bam duh ha ka ding ki dei kiba die ïa ki jaiñ second hand. Ha kane ka jingpluh ding ym shym la don satia kano-kano ka jingjia kaba sngewsih lait noh tang na ka jingjulor bad ingkhong jong ki jaiñ.
Mar ïa ïoh jingtip na ka liang ki kali pynlip ding ruh ki la wan poi mar-mar sha kane ka jaka ba pluh ding bad la lah ban tem noh ïa ka ding shuwa ba kan pur sha kiwei pat ki jingtei kiba don marjan.
Ha kaba ïadei bad kane ka jingjia, na ka liang jong ki pulit ruh kiba la wan poi ha kane ka jaka ki dang pynlong ïa ka jingtohkit ban lap ïa ki daw tynrai jong kane ka jingjia.
