Shillong, K’lyngkot 25
Wat la ka Congress ka la ïatreilang bad ka NPP ha Khasi Hills Autonomous District Council (KHADC). hynrei u nongïalam ka Congress Bah Pynshngaiñ N Syiem uba dei ruh u Symbud CEM ka KHADC u la ong ba ka shong beit ha ka mon laitluid ki MDC ban phet na kawei ka seng sha kawei pat.
Kane ka jingïakren bad u Bah Pynshngaiñ ka dei hadien ba u MDC ka Congress na Mairang konstitwensi Bah Batskhem Ryntathiang u la leit ban pynïasoh pura sha ka seng NPP ha Mairang kaba la pdiang burom da ka kyrtong MP Lok Sabha ka NPP ka Kong Ampareen Lyngdoh ha ka jingïadonlang ki nongkitkam ka NPP na Shillong.
Da ka jingphet seng noh u MDC ka Congress na Mairang konstitwensi kaba hap ha Eastern West Khasi Hills District, ki MDC ka Congress ha KHADC ki sah satang san ngut, kita u Bah RV Lyngdoh, Bah PN Syiem, Bah Gabriel Wahlang, Bah Charles Marngar bad Bah Carnes Sohshang.
Haba ïakren bad u Bah Pynshngaiñ u la ïathuh ba u Bah Batskhem haba u phet na ka seng Congress u khlem pyntip sha u, hynrei ïoh lehse u la pyntip sha u President ka MPCC u Bah Vincent H Pala.
Haba kylli kumno u sngew haba ka NPP ka tan noh ïa u MDC ka Congress haba ki ïatreilang ha Executive Committee, u Bah Pynshngaiñ u la ong ba um lah ban batai ïa kiwei ki seng saiñ pyrthei namar ka shong beit ha ka mon laitluid u MDC lada u kwah ban phet.
U la ong ba lada ka NPP ka tan jubor kan nym lah lada u MDC um don ïa ka mon laitluid.
Shuh shuh haba kylli la kan ktah ne em ïa ka seng Congress haba pynkhreh ïa ka ilekshon MP Lok Sabha, u Bah Pynshngaiñ u la ong biang ba ïa kane um lah ban batai namar ka dei beit ka mon laitluid ki MDC.
Namar kata, u don jingkyrmen ba ki MDC kiba sah mynta sa san ngut kin long kiba skhem.
Kum ban shu pynkynmaw, u Bah Batskhem Ryntathiang u la dep phet teng na ka Congress ban rung sha ka HSPDP, tangba hadien katto-katne por u la wanphai biang bad ïakhun ïa ka ilekshon MLA hynrei u la shah rem noh tang khyndiat vote ha u MLA ba mynta Bah Metbah Lyngdoh uba dei u President ka UDP.
