Shillong, K’lyngkot 25
Ka BJP Meghalaya da ka jingsarong ka la ïaroh bad pynkiew skong ba u Bah A.L Hek u dei u Myntri uba biang tam ban ïa kiwei pat ki Myntri hadien ba une u Myntri Sorkar u la ïohpdiang ïa ka khusnam ‘Dadasaheb Phalke’ ha New Delhi.
U Bah Hek u la ïohpdiang ïa ka khusnam ‘Dadasaheb Phalke’ ha New Delhi bad ïa kane ka khusnam la aiti da u Myntri Khynnah ka Sorkar Pdeng uba peit ïa ka tnat Social Justice, u Ramdas Athawale ha ka jingïalang kaba la long ha NDMC Auditorium, Jantar Mantar ha New Delhi ha ka jingïadonlang kiwei pat ki heh ki haiñ.
U Bah Hek u dei uba peit ïa ka tnat ri jingri ka Sorkar Jylla.
U Bah Hek u la ïoh ïa ka khusnam kum u Myntri uba tbit tam bad kum u nongtrei ha ka imlang sahlang. Kane ka khusnam ka long kum ka jingithuh ïa ka jingtrei jong u khlem shongthait na ka bynta ki paidbah ka Jylla bad ka jingnoh synñiang jong u ïa ka ri ruh kumjuh.
Haba ïaroh bad pynkiew skong ïa u Bah Hek, ka BJP Meghalaya lyngba u nongaiktien jong ka, u Bah Mariahom Kharkrang ka la ong ba kane ka long ka jingsarong ïa ka Jylla ba u Myntri Sorkar u ïohpdiang ïa kum kane ka khusnam bad u dei uba biang tam ban shahjied na ka bynta ki paidbah ka Meghalaya ha kaba ki nongshong shnong kin peit sha u kum u nongbtin lynti ha ki kam pynroi ha baroh ki liang bad kane ka pynshisha ba u Bah Hek u la leh ha ka jingïaid lynti jong u ha ka saiñ hima sima ha kine ki palat 20 snem.
Ka BJP ka la ong ba ym phylla shuh ba u Bah Hek u la wanrah ki jingmyntoi bad ki paidbah ka konstitwensi ki la bud lynter ïa u bad ai ka jingshaniah ïa u.
U Bah Hek u la ong ba kane ka khusnam ‘Dadasaheb Phalke’ ka dei ka burom kaba la ktah ïa ka mynsiem bad nang pynkhlaiñ ban nang trei shuh shuh na ka bynta ka jingmyntoi jong ka Jylla jong ngi bad ka ri.
