Shillong, K’Lyngkot:
Ka Bharatiya Janata Party (BJP)-Meghalaya ka la ong ba ka jingkynnoh ba khlem nongrim jong ka Congress halor ka jingjia ha University of Science & Technology Meghalaya (USTM) ka pynpaw ïa ka jinglong buitpoh jong ki nongïalam ka seng.
Halor ka jingkynnoh ki nongïalam ka Congress hapoh ka Jylla ba ka Sorkar ka la khang ïa ka jingleit u Rahul Gandhi sha USTM ha Ri-Bhoi hadien ka jingpynbor kaba la wan na Assam bad Delhi, ka BJP ha ka kyrwoh ka la ong, “Ka USTM ka la pynshai paidbah lyngba ka rynsan lad pathai ba ka Congress kam shym la ïoh jingbit na ki nongpynïaid jong ka distrik bad kumta ka USTM kam banse ban pynsangeh noh shuwa ïa ka jingai jaka ban pyndonkam da katei ka seng ha ka sngi ba wan utei u khlieh ka seng.”
Ka BJP ka la ong ruh ba ka jingkheiñ sting jong ka Congress ban pynbiang ïa ki kot ki sla ban pynlong ïa kata ka jingïalang ka pynpaw ïa ka jingbym kheiñ snep jong ka Congress ïa ki bor Sorkar, ha kajuh ka por ka pyni shai ïa ka jinglong barieh jong ki nongïalam ka seng.
Ka BJP-Meghalaya ka kyrpad ruh ïa ki nongïalam ka Congress ban long shida noh ha ka rukom treikam bad lada ka long kaba khia haduh katta-katta ïa ki, kata kim dei ban shu kren laplah man ka por.
Ka seng ka la ong ruh ba ka jingbuhrieh ïa ki jingshisha bad ka jingkynnoh ba khlem nongrim jong ka Congress ka pynpaw ïa ka jingjaboh ka jingbym larkam kumjuh ka jinglong buitpoh jong ki nongïalam katei ka seng.
“Na ka por sha ka por ka Congress ka ju kynnoh ba ka BJP ka synshar donbor, hynrei ka la klet mo ïa ka ‘Emergency’? Mano ba synshar donbor ïa ka ri ha kito ki snem, hato ym dei ka Congress? Mano ba ju mlien ban wanrah ïa ka ‘President Rule’ bad ban weng jubor ïa ki Sorkar Jylla ba la jied da ki paidbah, hato kam dei ka Congress? Mano ba la set jubor bad khang ïa ki nongthoh khubor ban kren laitluid, hato kam dei ka Congress?” ong ka kyrwoh na ka BJP.
“Kane ka rukom ban shu kynnoh laplah bad ban kdew kti ka paw shai ba ka Congress kam don jingmut eiei ban ai ka jingshakri kaba khuid sha ki paidbah. Ka por ka la kylla ba ki nongshong shnong ki kwah ïa ka jingsynshar kaba khuid, kaba ïohi paw bad kaba don ïa ka jingkular kaba skhem,” ong ka BJP.
Shuh shuh haba pynshai halor ka jingjop ilekshon na ka por sha ka por jong ka BJP, ka kyrwoh ka la ong ba dei namarba ka seng ka la lah ban wanrah ïa baroh ki jingkylla bad ki paidbah ki hun.
“Kumba ka ktien “Satyameva Jayate” ka ong ba ka hok kan ïeng rasong, ka pawshai na kane ka jingja ha USTM ba ka Congress kan sa duh biang ïa ka jingshaniah jong ki paidbah ha kane ka ilekshon MP ban sa wan,” ong ka kyrwoh na ka seng.
