Shillong, K’Lyngkot 25
U President rangbah ka Voice of the People Party (VPP), u Bah Ardent Miller Basaïawmoit, u la ong ba ha ka jingshisha lada ngi kwah ïa ka Lokayukta kaba ym don mano-mano ban mushlia, ka dei ban thung da ki ophisar kiba la shongthait na ka kam namar ki ophisar kiba la shongthait na ka kam kim tieng shuh ïa ki Myntri hynrei ka jingthung kam pat da u ophisar uba dang trei, u hap ban pyndem bad tieng ïa ka sorkar.
Haba ai jingkren ha ka jingïalang pynsngewthuh bad pynshai paidbah ha Mawkhar hajan ka YMCA ha kaba ïadei bad ka jingdawa jong ka seng na ka sorkar jylla ban sangeh ka jingtuklar ha kaba ïadei bad ka rukom treikam jong ka Lokayukta bad ruh ban thungkam biang ïa ki 3 ngut ki ophisar kiba la shah wengkam, u Bah Adent u la ong, ba lada kum ki paidbah ki shah ba ka sorkar kan leh katba ka mon ïa ka iktiar kaba la pynkupbor kaba la thaw da ka sorkar na ka bynta u paidbah ka mut ki paidbah ki la leh bakla shibun eh.
“Ngi dei ban snegwthuh ba lada ka bor jong ka Lokayukta ka khlaiñ, ka jingmyntoi bad ka jingïada ka dei ïa nga bad ïa phi iwei-pa-iwei na ki kam bamsap jong ki briew kiba don ha ka bor”, la ong u Bah Ardent.
U la ong ba ka jingmih jong ka VPP ka dei namar ba ki seng saiñ pyrthei kiba don hapoh ka jylla naduh ki seng saiñ pyrthei kiba heh haduh ki seng riewlum, ki la phiel ïa ki paidbah ha ki liang baroh.
U la ong ba lada ka VPP ka kwah ban rieh tngen ka don ïa ka jaka ba kan leh kumta da kaba shu ong ïa u paidbah ba yn leh shuh kumno haba ki pynjop tang 4 ngut ki kyrtong na ka seng hynrei ïa ki jingeh jong ki paidbah ka jylla la bsut ha ka VPP kaba don tang 4 ngut ki MLA.
U la ong ba ym ban shu ong ba ki 4 ngut ki MLA ka VPP ki dei ka sur jong u paidbah hynrei ka jingmih jong ki paidbah ka pynskhem ïa kaei ba ka VPP ka ong ïa ka sorkar ba u paidbah u don ryngkat bad ka seng.
U la ong ba kumno yn lah ban pdiang ïa ka jingpynshai jong ka sorkar ba ka jingwengkam ïa kitei ki 3 ngut ki ophisar ka Lokayukta ka dei ban pyllait na ka jinglut jingsep ban siew ïa kitei ki 3 ngut hynrei la ïohi pat ba katei kajuh ka sorkar ka la pynsyrwa kai ïa ka pisa u paidbah da ka jingthungkam ïa ki Chairman, Consultant bad ka jingleit shangkai shabar ka ri ka la long kaba ishyrkhei.
U la ther tyngeh ruh ïa ka sorkar ha kaba u la ong ba ka sorkar ka la shim da ka ram T. 18 klur tang ban maramot ïa ka jingkieng Damsite hynrei ka don pisa pat ban thungkam Chairman man la ka sngi.
U la ong ba sorkar MDA ka ju ong ba kam don pisa haba ka seng VPP ka leit ban tynruh ïa ki skhim, ki surok bad kiwei kiwei ki kam pynroi hynrei kaei kaba jia pat ka long ba ki kontraktor jong ka National People’s Party (NPP) ki kham bun pisa ban ïa ka sorkar.
U la ong ba ki la don ki jingkynthoh ba ki katto katne ki paidbah kiba la ong ba kiba duk ki shem jynjar naduh ba jop kitei ki 4 ngut ki kyrtong ka VPP na ki 4 tylli ki konstitwensi namar ba kim ïoh shuh ïa ka bai dawai dashin ne ki jingdonkam.
“Ka VPP kam kwah ïa ki paidbah kiba duk ba kin leit ïeng laiñ haïing jong u MLA ban leit pan bai kot ne bai dawai hynrei ka dei ka kamram jong ka sorkar ban pynbiang ïa ki jaka sumar bad ki jingdonkam”, la ong u Bah Ardent.
U la ong ym don ba lah ban khang ïa ka lyer jong u Prah namar ka lyer jong u prah ka dei ka sur jong u paidbah u ba don ïa ka jingshaniah ban pyllait na ka jingbamsap bad ka jingleh shiliang khmat jong ka sorkar.
“Mynta yn nym don ba lah ban khang ïa ka lyer jong u prah kat shaba leit”, la ong u Bah Ardent.
U Bah Ardent u la ther tyngeh ruh ïa ki seng riewlum kiba kwah ban wanrah ïa ka jingïatylli tang la jan dei ka por ilekshon hynrei hadien ka ilekshon pat tang para maki ruh ki ïa mih ki kynrum ki kynram.
“Ngin nym lah ban ïatylli lym da ka nongrim ka long kaba skhem bad ka jingïatylli ka jong ngi ka dei tang ka nongrim”, la ong u Bah Ardent.
