Shillong, K’Lyngkot:
Ka Voice of the People Party (VPP) ka la ong ba ki samla pule kim dei ban long ki ‘langkñia namar ka jingbym lah jong ka Sorkar ban pyntreikam ïa ka Common University Entrance Test (CUET) hapoh ka Jylla.
Ka seng ha ka jingthoh ba la phah sha u Myntri Rangbah ka Jylla, u Conrad K. Sangma ka la pynkynmaw ïa ka jingpynmih jingbthah jong ka Sorkar sha baroh ki Principal jong ki kolej, ki skul Higher Secondary bad sha baroh ki District School Education Officer (DSEO) haba ïadei bad ka jingpyntreikam ïa ka CUET-UG na bynta ban ïoh rung sha ki jingpule ba shajrong ba kynthup ïa ka Under-Graduate (UG) bad Post Graduate (PG) ha ki kolej bapher-bapher hapoh ka Jylla.
“Haba ïadei bad kane, nga kwah banjur ïa phi ban pyntikna ba ka Jylla ka don ïa baroh ki ‘Computer Based Testing Centre’ (CBTC) ban pynbit pynbiang ïa ka jingdonkam jong man la ki samla pule kiba hap ban ïakhun ïa ka CUET,” ong u General Secretary ka VPP, Dr. Ricky A.J. Syngkon ha ka jingthoh ba la phah sha u Myntri Rangbah.
Ha kajuh ka por, ka seng ka kyntu ïa u Myntri Rangbah halor ka jingdonkam ban shim ïa ki sienjam kiba mardor na ka liang jong u – ban pynïeng ïa ki jaka thoh eksam (Testing Centre) kiba bit ba biang ha ki bynta bapher-bapher jong ka Jylla.
“Kumba ka long mynta, bun na ki khun samla jong ngi ki hap ban duh noh ïa bun ki eksamin ban ïoh rung sha ki jaka pule kumjuh ki eksamin kam namar ka jingbym don ki jaka thoh eksam kiba biang hapoh ka Jylla – ha kawei ka liang ki duh noh ïa ka kabu ksiar ban ïoh pule ïa ki jingpule ba shajrong ne ha ka liang ka kam ka jam,” ong utei u nongïalam.
U General Secretary haba kdew ïa ki jingeh haba ïadei bad katei ka bynta u la ong ba ka jingphah thoh eksam ïa ki khun samla shabar ka Jylla ka ktah shi kat dei ha ka liang ka pisa-pilaiñ bad jingmut jingpyrkhat jong ki lem bad ki bahaïing hasem kumjuh.
“Shim ïa ka nongrim kaba skhem pyrshah ka jingpyntreikam ïa ka CUET na bynta ki kyrdan pule UG bad PG lymda pynïeng shuwa ïa ki jaka thoh eksam kiba bit ba biang hapoh ka Jylla,” u la ong.
Shuh shuh u la bynrap, “Ki samla pule kin ym lah ban long langkñia namar ka jingbym lah jong ka Sorkar.”
Nalor kane, ka seng ka la pynsngew ba ka jingpyntreikam jubor bad khlem da pyrkhat ïa ka CUET kan ïalam sha ka jingkiew ha ka jingpep shiteng por jong ki samla ïa ka jingpule khamtam ha ka kyrdan pule UG.
