Shillong, K’Lyngkot:
U Bah Ardent Miller Basaïawmoit u la ong ba ka shnong Mawlai ka long ka shnong kaba ai mynsiem ïa ka Jaitbynriew bad ka dei ka shnong ba katba ym pat mih ki paidbah ka Mawlai kam pat rhem ka jingïakhih ban ïoh ïa la ka jong ka jylla kaba pura.
Haba ai jingkren ha ka jingïalang pynsngewthuh paidbah jong ka seng halor ka jingshah weng kam jong 3 ngut ki ophisar ka Lokayukta kaba la long ha Mawlai Petrol Pump ha ka Sngi Balang, u Bah Ardent u la ong ba ka jingshah ktah kti u nongmihkhmat ka Mawlai, u Bah Brightstarwell Marbaniang ha ki pulit bad ha ki bor ka distrik ha ka jingïakhih jong ka seng hakhmat ka ophis Secretariat ha ki khyndiat sngi ba la dep, ka dei ka jingïuhroit ïa ka bor jong ki paidbah ka Mawlai.
“La jied ïa u MLA jong ka VPP da ki paidbah jong ka shnong Mawlai bad la jied donburom ïa une u samla rangbah jong ngi ym dei ba un shah patrong ha ki bor pynïaid distrik”, la ong u Bah Ardent.
Shuh shuh u Bah Ardent u la ong ba haba utei u nongmihkhmat u la mih shakhmat na ka bynta ban pyrshah ïa ka bamsap, kum ki paidbah kim dei ban long tang ki nongpeitkai hynrei nangne shakhmat u kwah ba ka vote ba ki paidbah ka Mawlai ki la thep ha u Bah Brightstarwell kaba long arphew saw hajar tam, ki dei ban mih noh sha madan tang shiphew hajar ruh ka lah biang ban ai jingkyrshan ïa ka seng bad ïa utei u nongmihkhmat ha ki jingïakhih.
Ha kaba ïadei bad ka jingpynshai halor ka Lokayukta bad ka jingshah wengkam jong 3 ngut ki ophisar, u Bah Ardent u la ong ba kum ki Myntri ka sorkar lada kim pat sngewthuh bad ki dang bakla ban pyntreikam ïa ka aiñ ka Lokayukta ki la dei ban hiar shuki noh.
U Bah Ardent u la ong ba ka jingkren tipbriew u Myntri Rangbah ka jylla, u Conrad K. Sangma ha kaba u la pynksan ba lada thungkam ophisar da ki briew kiba la shongthait, ka wanrah ïa ka jinglutphut ha ka pisa ka tyngka hynrei na ka liang ka VPP ka la dep ban phah da ka jingkynthoh sha ka sorkar ba kam dei ban pynlutphut ïa ka pisa u paidbah ban thung Chairman man la ka sngi ha ki tnad treikam sorkar bapher-bapher.
“Kane ka dei tang ka buit ban ïada bad ban pulom ïa ka jingtohkit jong ka Lokayukta ïa ki kam bamsap”, la ong u Bah Ardent.
Shuh shuh u Bah Ardent u la ong ba ka seng kan nym sangeh ka jingïaleh tad haduh ba ka sorkar kan da pyndem toiñ bad ka sorkar kam lah ban shu wengkam ïa kitei ki ophisar namar kim dei ki riewkai hynrei ki dei ki riewdonburom kiba la trei hok ïa ka kam.
“Shen ym slem ba lada ka sorkar jylla kam tuklar, kine baroh kiba don bynta kynthup ïa kita ki bahaïing jong u Myntri Rangbah ki dei ban shah thep sha along, ka don ka jingtuklar jong ka sorkar bad ka sorkar mynta ka pyrshang ban thet-kti ban ong ba kan nym thungkam ïa kine ki ophisar bad ba kam donbor satia ban thungkam hynrei ba ka dei hi na ka liang jong u Chairman”, la ong u Bah Ardent.
U la ong ba ka seng ka khmih lynti ba u Chairman jong ka Lokayukta un ïohi ïa kane ka jingthet-kti jong ka sorkar bad ki khmih lynti ba kum u Chairman un pynshai ha kaba ïadei bad kane ka bynta, balei ba u ailad ba ka sorkar kan tuklar halor kane bad balei u wengkam ïa kitei ki ophisar halor ka jingbthah jong ka sorkar.
U la ong ba ym don napdeng kiwei pat ki seng saiñ pyrthei kiba kwah ba ka Lokayukta kan khlaiñ namar ki don ka jingma kaba khraw hynrei kum ki nongïalam kiba ïaleh pyrshah ïa ka bamsap, ki kwah ban pyntikna ba ka Lokayukta ka dang dei ban khlaiñ nangne shakhmat.
