Shillong, K’lyngkot 25
U MLA ka Voice of the People Party (VPP) na North Shillong, Bah Adelbert Nongrum, u la pynthikna ba ki saw ngut ki MLA kin nym ïapeiñ bad ka shuki namar ki paidbah ki la jied ïa ki ha ka ilekshon khlem da pyndonkam pisa.
Ïa kine ki kyntien u Bah Adelbert Nongrum u la kren ha ka jingïalang ka VPP ha YMCA Mawkhar kaba la long ha ka janmiet Sngi Palei ban pynshai sha ki paidbah halor ka jingshah weng kam jong ki ophisar ka Lokayukta kaba dei ban peit ïa ki kam bamsap hapoh ka jylla.
U la ong ba la seng ïa ka VPP ban rat dyngkong ïa ka kam bamsap namar ha kine ki sanphew ar tylli ki snem la jyllei tang ka bamsap kaba la tuh ïa ka hok jong ki pateng ban wan.
“Ngim shym la thaw ïa ka seng VPP ban ïalam bakla ïa ki paidbah hynrei ban kren ïa ka hok bad ka jingshisha” u la ong.
Nalor nangta u la phla ruh ba ki saw ngut MLA ka VPP ki la pyrshang ban pyndep ïa ka kamram ha ïingdorbar thawaiñ ban kren ïa ki mat jong ka jaidbynriew hynrei namar ba duna ki MLA ym shym la poi sha ka thong.
Shuh shuh u Bah Adelbert u la pynkynmaw ba ka jingshah leh be-aiñ ïa u nongthaw aiñ ha kiba bat ïa ka aiñ khlem da buh kyrteng bad kahdur khmat ka pyni ïa ka jingkhawpud.
“Haba ngi leit sha ïingdorbar ngi da buh ïa ka kyrteng ban ithuh, hynrei ki pulit kiba bat aiñ ki buhrieh kyrteng ïalade, hynrei kum ka seng ngin shim ïa ka aiñ kaba tyngeh khnang nym jia shuh” u la ong.
Ha kajuh ka por u la ong ba ka Lokayukta ka dei jong ki paidbah bad kumta u la kyntu ïa ki paidbah ban long kiba la pynkhreh ban ïakhun ban pynduhjait ïa ki kam bamsap.
