Shillong, K’Lyngkot 25
Ka jingkhlad jong kawei ka samla kaba dang 23 snem ka rta kaba la don hapdeng ka jingshah sumar ha North Eastern Indira Gandhi Regional Institute of Health and Medical Sciences (NEIGRIHMS), Mawdiangdiang, ka la pynlong ïa ki bahaïing hasem ba kin kynnoh ba ka jingkhlad jong ka, ka dei namar ka jingbym shimkhia ki doktor bad ki nos.
Kane ka samla kaba la duh noh ïa la ka jingim ka dei ba la tip kyrteng kum ka Ranisha Syiemlieh bad ka la khlad ha NEIGRIHMS ha ka 23 tarik Kyllalyngkot.
Na ka liang ki bahaïing jong kane ka samla ki la pynpaw ba ka jingkhlad noh ka khun jong ki, ka dei namar ka jingleh torti ka hospital bad ka jingbym shimkhia jong ki doktor bad ki nos.
Ki la pynpaw ka jingsngew lyngngoh halor ka jingsumar kaba ai ïa ka khun jong ki, da kaba shu puid khlem da tip thikna ïa ka daw tynrai jong ka jingpang. Nangta ki la ong ba haba pyrshang ban pan ïa ki kot ki sla jong ki jingpang ba kane ka khun jong ki ka don, na ka liang ki doktor bad ki nos ki la kyntait ban ai kaba la pynlong ïa ki bahaïing ban bitar bad ruh sah ha ka umdum.
Shuh shuh kane ka samla kaba la don hapdeng ka jingshitom bad ha ka jingtlot jong ka met ka la ïaleh ban thoh katba lah ha ka kot sada halor kaei kaba la jia hapoh ka kamra ICU da kaba ong ba ki doktor bad ki nos kiba trei ha NEIGRIHMS kim shym la shimkhia ïa ka kam bad ki la shu ieh bad leh tang dep.
Halor ka jingkhlad jong kane ka samla, haba ïoh ïakren bad u kpa jong ka, u Bah Yespar Sohshang, u la ïathuh ba ka khun jong u ka la khlad ha ka por kumba 11 baje eiei mynmiet ha ka 23 tarik Kyllalyngkot.
U la ïathuh ba ha ka Sngi U Blei ha ka por kumba 3 baje mynstep u la ïoh ïa ka ‘phone call’ na ka khun jong u, kaba khot ïa u ban wan sha hospital da kaba ong “Pa, wan kloi, nga la ïap” bad na ka liang u kpa u la ïathuh ba namar ka jingbym khlaiñ ka met u la phah noh ïa la i pyrsa kurim ban leit sha hospital.
U Bah Yespar u la ong ruh ba haba la pyrshang ban ïakren bad ki nos ha kane ka jaka ai jingsumar, kim shym la treh ban kren bad ka hospital ruh ka la shu ai tang ka syrnod ba ka la khlad lane ka ‘Death Certificate’ jong kane ka samla.
Ïa ka met kaba sah jong ka samla Ranisha la tep donburom ha ka Sngi Palei ha u lum jingtep ka Balang Katholik Nongshiliang, Nongthymmai.
Hashwa ban rah ïa ka met sha lum, na ka liang ka ïing ka sem bad ka Balang ki la pynlong da ka jingïalang bad ka jinglehniam khatduh ha phyllaw ïing kaba don ha Lapalang, Pdengshnong.
Haba pyrshang ban ïakren bad ka bahaïing jong kane ka samla ka la ïathuh ba ki doktor kiba sumar ïa ka khun jong ki, ki khlem ïathuh eiei hynrei ki shu phah beit tang ban leit sha ki bynta ba shapoh jong ka hospital ban shim ïa ka met.
Ka la ïathuh ruh ba ka rukom puid jong ki doktor ïa ka khun jong ki, ka long beit kumba puid blang puid masi bad kaba da ima shisha ka rukom leh.
Shuh shuh ka la ong ruh ba ka khun jong ki, hashwa ban khlad, ka la ïoh ban thoh da ka shithi kaba pyni ba ka la pan jingïarap hynrei ki nos ha jaka ba kin ïarap, ki la shim la ki syngkhlieh bad ban thiah pynban ïalade.
Ha kaba ïadei bad kane, na ka liang ka ïing ka sem jong katei ka samla ki la buh jingkylli ïa ka NEIGRIHMS ba kin ïathuh shai ba kaei kata ka jait jingpang kaba ki la ïoh ban shim na ka met jong ka khun jong ki.
