Jowai, K’Lyngkot:
U Myntri Rangbah ka Jylla, Conrad K Sangma, ha ka 23 tarik mynta u bnai u la plie paidbah ïa ka jaka ai jinghikai kaba tip kum ka Wahïajer Prime Hub kaba don hajan ka madan jong ka shnong Wahïajer, West Jaiñtia Hills District.
Ha kane ka sngi la donlang arngut ki Symbud Myntri Rangbah ka Jylla ba kynthup ïa u Bah Prestone Tynsong, u Bah Sniawbhalang Dhar, u Myntri ka tnat Food Civil Supplies & Consumer Affairs u Bah Comingone Ymbon, u Deputy Commissioner ka West Jaiñtia u Bah BS Sohliya nalor ki ophisar sorkar, ki riewpawkhmat bad ki nongkitkam jong ka IVCS bad ki nongshong shnong.
Ïa kane ka Prime Hub yn pynïaid da ka Integrated Village Cooperative Society (IVCS) bad ka don ïa ka shlem ai jinghikai, karkhana bad ka Cold Storage ne ka jaka pyllang ïa ki mar ban lait na ka jingpyut.
Nyngkong ha kane ka Hub yn ai jinghikai shwa kumno ban shna synsar da kaba pyndonkam da ki kor ka juk mynta bad hadien yn hikai ïa kiwei pat ki jait mar rep bapher bapher khnang ban myntoi ki paid nongrep.
U Myntri Rangbah ha ka jingkren u la ong ka jingdon jong ka Prime Hub kan ïarap bad kyntiew ïa ka ïoh ka kot jong ki nongrep ka thaiñ kumjuh ki nongseng kam lajong da kaba kin ïoh ïa ki lad jinghikai bapher bapher kumno ban shna bad ban pynïaid ïew ïa ki mar ki mata ba ki pynmih lyngba ki mar rep mar riang.
U Myntri Rangbah u la ïathuh ruh ba ka Jylla ka shalan ïa u synsar bad phlang la kumno kumno 1000 klur ha ka shisnem bad mynta da ka jinglah ban pynkylla ïa u phlang sha u synsar ban pyndonkam, ka jingïohnong kan kiew sha ka 2000 klur shisnem bad baroh ka pisa kaba mih kan leit sha ki Cooperative Society, ki nongrep bad ki nongseng kam lajong.
Ïa kane ka Prime Hub kaba pyndonkam da Solar Energy la pyndep 8 bnai ha ka jinglut kaba 4 klur tyngka.
