Nongstoiñ, K’Lyngkot 25
Ka jingïa-mih jingïa-rung jong ki ‘riew pawkhmat na ki seng saiñ pyrthei na kawei ka seng sha kawei pat mynta ka la sdang biang da ka jingthmu ba lehse lyngba kata ka jingleit, kin ïoh ïa ka jingshakri kaba khambha na ka bynta u paidbah.
U Bah Batskhem Ryntathiang uba dei u MDC ka Congress na Mairang-Nongkhlaw Konstitwensi ha ka Sngi Palei ha ryngkat bad ki nongkitkam kiba ju ïatreilang bad u na ka Congress ki la leit ban pynïasoh noh bad ka National People’s Party (NPP).
Ïa kane la ïohi ha ka jingïalang kaba la pynlong ha phyllaw ïing u Bah Bell kaba don ha shnong Mairang Mission, Eastern West Khasi Hills District.
Ïa une u MDC ka Mairang bad ki nongkitkam la pdiang burom bad pynskhem sha ka sem jong ka NPP da u State Working President ka NPP u Bah Hamletson Dohling ha ka jingïadon lang ka Kong Ampareen Lyngdoh, Myntri Sorkar kaba long ruh ha kajuh ka por ka kyrtong MP na Shillong Parliamentary Constituency lem bad ki nongkitkam jong ka seng.
“Phim dei ban sngewthuh bakla, ngim don eiei na ka bynta ka seng Congress haba ngi hap ban iehnoh,” la ong u Bah Batskhem Ryntathiang uba la pynsngew sha ki paidbah ha ka jingïalang pynskhem bad pdiang ïa u sha ka NPP ha Mairang, Mission.
Shuh shuh ha kane kajuh ka sngi, u MDC barim ka Nongstoiñ Constituency, Bah LG Nongsiej ha ryngkat bad ki nongbud jong u ki la leit ban rung bad pynïasoh sha ka NPP ha ka jingïalang kaba la long ha Nongstoiñ ba la pdiang bad pynskhem da ki nongïalam ka seng.
U Bah Nongsiej haba ai jingkren ha ka jingïalang, u la ai khublei ïa ka NPP Nongstoiñ Block bad ïa ka NPP jong ka Jylla hi baroh kawei, ha kaba u la ong ba kaei kaba pynlong ïa u bad ka kynhun ba kin hap ban ïa wan ban ïatrei ryngkat bad ka NPP ka dei namar ki kam ba radbah ba kane ka sorkar ka la leh bad kata ka dei ba ym lah ban klet.
U la ïathuh ruh ba ha ki phew snem mynshuwa ha Nongstoiñ konstitwensi ki don bun ki shnong lada ïaid da ka Jeep lane ki kali four wheeler ym lah ban poi sha ki shnong hynrei ha ka jinglong MLA jong u Bah Macmillan san snem kita ki shnong ki la lah ban ïaid wat da ki kali rit ruh bad ym tang katta ki skul bad kiwei kiwei.
“Kine kiei-kiei ka pynlong ïa ngi ba kam don jingmut ïa ngi ba ngin ïaleh pyrshah lada ngi ïohi ba ki don ki jingkylla, ka kham bha ïa ngi ban ïatreilang khnang ba ngin nang lah ban kyntiew shuh shuh ïa ki kam pynroi hapoh ka dong bad ka thaiñ ka jong ngi,” la ong u Bah Nongsiej da kaba u la bynrap ruh ba kata ka dei ka mat kaba hakhmat eh ba na ka liang jong u bad ka kynhun ki kloi ïa ka ban wan ban ïatreilang bad ka NPP.
