Shillong, K’Lyngkot 25
Ka Sorkar India ha ka Sngi Palei ka la pynbna ïa ka kyrteng jong I Kong Silbi Passah ba in long i nong ïohpdiang ïa ka khusnam Padma Shri na ka jylla Meghalaya.
I Kong Passah i dei i longkmie iba la pawnam ha ka liang ka put ka tem bad ka rwai ka siaw tynrai lane ‘Folk Music’. Ka jingshah jied jong i Kong Passah na ka bynta ka khusnam Padma Shri ka dei ha ka liang ka ‘Art’.
Haba pynbna ïa ka jingai khusnam sha I Kong Passah, la ong ba ine i longkmie i dei iba la paw bha ha ka jingpynkhie im ïa ki jingshad Khasi kiba la rim bad i la don bynta ban pynkiew ïa ka dei riti ki Khasi bad Jaiñtia.
Mynta u snem, ka President ka Ri India ka la ai jingmynjur ban pynkup burom ïa 132 ngut da ka khusnam Padma ba kynthup ïa 5 ngut da ka khusnam Padma Vibhushan, 17 ngut ka khusnam Padma Bhushan bad 110 ngut ka khusnam Padma Shri.
Napdeng ki nongïoh khusnam, 30 ngut ki dei ki kynthei, 8 ngut kiba nabar ri (Foreigner/NRI/PIO/OCI) bad 9 ngut ki dei kiba la khlad.
Ïa kine ki khusnam yn sa ai da ka President ha u bnai Lber/Ïaïong ha ka jingïalang ka ban long ha Rashtrapati Bhavan.
Lah ban kdew ba I Kong Passah, iba shong ba sah ha Riatsamthiah, Shillong, i la ïoh ruh ïa ka khusnam Sangeet Natak Akademi Award na ka bynta u snem 2021 ha ka liang ka put ka tem bad ka rwai ka siaw tynrai. Ïa kane ka khusnam la ai da ka President ka Ri India ha ka 24 tarik Rymphang, 2023 ha New Delhi.
